Te ainda, Fondo di Pensioen di Sector Turismo di Aruba (PFTSA) no a  confronta  niun problema cu gobierno riba pago di debe di bononan  di e fondo aki, asina su directora, Sanaa Baroud a declara na Bon Dia Aruba. “Tog, nan ta safe y e risico ta minimo”, el a bisa.

Sra. Baroud a declara cu no ta algo simpel cu un gobierno por bay failliet, e no ta un proceso cu “ta pasa di un dia pa anochi”. Asina mes nan fondo ta tene cuenta te hasta unda nan por a bay den nan inversionnan. E ta haya cu un indicador positivo ta cu nan “dekkingsgraad ta na 104.5 esaki kitando e “buffer” di mas of menos 2%. Pues un rango di cubrimento asina ta indica con solido e fondo ta, segun Sra. Baroud. Na e momento ey, e no tabatin e cifra di e debe cu gobierno tin cu e fondo aki. Sinembargo el a laga sa cu den nan inversionnan nan tin 40% – y e ta bahando – den inversionnan di bononan di gobierno.

Diversificacion  y inversion
Fondo di Pensioen pa Empleado di Sector Turismo ta purba di diversifica lo mas amplio posibel nan inversionnan. “Nos ta diversifica nan pasobra si algo ta bay robes  den un seccion, bo tin suficiente sosten den e otro partinan”, el a declara. Di e forma aki nan ta evita di por haya un golpi cu lo por tin consecuencia grave pa  nan fondo.

Te aworaki e ta retira cu nan no tin problema cu e pago di e bononan aki di parti di gobierno. Te hasta tin algun di e bononan aki cu ta bay caduca e aña cu ta bin aki. “Gobierno ta pagando nos debidamente”.

El a bisa cu e maneho cu e fondo aki tin pa loke ta trata su inversionnan ta uno hopi conservativo. Nan kier minimalisa e risiconan y nan kier tin siguransa cu nan miembronan ta haya nan pensioen manera e fondo aki a compromete cu nan y dunando nan un 4% di interes.

Nan ta inverti den nan mesun miembronan pa medio di otorgamento di hipoteca. Actualmente nan tin un campaña di otorga hipoteca na un interes di 6,25% pa nan miembronan absolutamente.  Tambe nan tin deposito den diferente entidad entre nan AIB ariba diferente inversionnan cu tin pa ehempel cu WEB y otro companianan.

Den nan rapport anual cu ta keda presenta awe den nan asamblea general cu nan miembronan pa garantisa transparencia di nan fondo, nan tin poni na unda nan ta inverti. Mayoria di nan inversion entre 88% pa 90% di nan inversionnan ta local. “Nos ta hopi orguyoso di bisa esey”, el a declara. E ta conclui cu nan fondo ta uno stabiel y hopi solido. E asamblea aki ta tuma luga awe na La Cabana  pa 3or atardi.