Directora di e Fondo di Pension di Sector Turismo di Aruba (PFTSA), Sanaa Baroud a declara cu nan fondo ta hopi solido y stabiel.
Nan a cera aña 2016 cu 83 miyon, y ora cu nan ta compara e cifra aki cu e aña anterior nan a crece for di 63 miyon pa 83 miyon na aña 2016, kiermen nan a produci 20 miyon extra. Nan a crece y actualmente nan miembronan ta alrededor di mas cu 8 mil.
E ta reconoce cu awendia ta dificil pa bo mantene cifra positivo asina pasobra e inversionnan pa bo por haya un bon resultado no ta facil pa bo haya. “Bo mester tuma cierto risiconan pa bo haya un interes mas halto”. Asina mes e ta wak cu PFTSA ta logrando di mantene e nivel di crecemento di nan fondo.
Dia 23 di juni durante nan asamblea general cu lo tuma luga pa 3or atardi na La Cabana Beach Resort nan lo presenta nan hunta directiva ya cu nan tin miembronan nobo. Igualmente nan lo presenta nan cifranan di forma transparente pa asina nan miembronan por formula nan pregunta y mantene.
El a bisa cu nan sistema di administracion ta uno hopi simpel; y e ta transparente. Tambe nan miembro via online tin acceso pa wak kico nan dunado di trabou a contribui pa nan y nan sistema administrativo di pension ta up date. E mesun dia di e asamblea general lo introduci un aplicacion (app) nobo caminda via bo telefon e miembro tin acceso na tur su informacion personal.
Intencion tras di esaki ta pa mantene e confiansa di nan miembronan cu nan fondo ta wordo maneha di forma responsabel y transparente, segun e fondo.
