Algun persona envolvi den e caso a wordo laga den libertad OM ta aclara confusion relaciona cu caso IBIS

Pa medio di un relato di prensa, Ministerio Publico (OM) taaclara e confusion cu supuestamente a debolbe cosnan cu a wordo confisca di Minister Paul Croes relaciona cu e caso IBIS na unda e mandatario ta wordo sospecha di varios delito. Den e ultimo oranan a laga varios sospechoso den libertad. Minister Angel Bermudez kende awor ta encarga cu e carteranan di asuntonan social, hubentud y labor tambe ta duna su reaccion na Bon Dia Aruba.

Segun e relato di OM,  hues-comisario a confisca cosnan na Bestuurskantoor, bao di cual cosnan for di oficina di e sospechoso Croes. Recientemente algun di e cosnan cu a wordo confisca na Bestuurskantoor a wordo debolbi na Bestuurskantoor. Bao di e cosnan aki tin algun USB-stick, computernan, laptopnan y un telefon blackberry. OM ta splica cu si algun di cosnan aki a wordo duna na sospechoso Croes door di Bestuurskantoor of den nomber di Bestuurskantoor, no ta conoci na OM ni tampoco e ta responsabilidad di OM. E relato ta bisa cu e cosnan cu hues-comisario a confisca den e investigacion IBIS den cas di sospechoso Croes, no a wordo duna bek na dje; E cosnan aki ta sigui confisca.

OM ta finalisa bisando “Cosnan cu wordo tuma den beslag na beneficio di waarheidsvinding den un investigacion, ta wordo debolbi asina cu e investigacion riba e cosnan ey ta cla. Cu cosnan wordo debolbi na un sospechoso durante e investigacion penal no ta bisa nada tocante e sospecho of e resultadonan di e caso penal. E ta nifica unicamente cu e investigacion riba e cosnan specifico ey ta cla.”

Sospechosonan laga den libertad
Ayera atardi a drenta e noticia cu diaranson a detene e homber di inicial T.Y.C. relaciona cu investigacion cu ta andando. Mientras tanto ayera tardi a drenta e noticia cu e sospecho a wordo laga den libertad.

Segun informacion cu nos redaccion a ricibi, e dos damanan di inicial A.V. y L.M. tambe a wordo laga den libertad. Na e momento aki tin solamente dos sospechoso deteni despues cu algun dia pasa hues-comisario a prolonga nan detencion.

Reaccion minister Bermudez
Bon Dia Aruba a acerca minister Bermudez cu e pregunta di kende exactamente e materialnan ta cu a wordo entrega bek na bestuurskantoor relaciona cu caso IBIS. Den un reaccion corto Sr. Bermudez ta confirma na nos redaccion cu e materialnan cu tabata confisca den caso IBIS y a wordo debolbi na bestuurskantoor ta propiedad di Land Aruba y no di Paul Croes.