Pa varios aña caba un comentario cu no ta falta ta cu na Aruba hende tin miedo. Funcionario cu tin miedo di papia, a pesar cu en general ta papia masha bunita di ‘klokkenluiders’ cu mester mas proteccion legal ora nan trece cosnan afo cu no ta anda bon den e aparato gubernamental. Di loke nos ta mira den practica no a cambia tanto ainda pa loke ta esunnan cu di buena fe y pensando riba interes general ta haci esaki.
Hasta nos tabatin caso di funcionario publico cu a haya nan mes ‘entre la espada y la pared’, pasobra nan mester tuma cierto paso legal contra ban bisa un cierto empresa grandi, ta cumpli cu nan deber, y despues ta haya nan cu e acusacion di e mandatario cu nan ta purba daña relacion amigable entre e compania y gobierno. E asunto a haya consecuencia grave pa e funcionarionan sin ningun aparente remordimento di consenshi cerca e mandatario en cuestion. En todo caso no un recomendacion na otronan pa sigui nan ehemplo. Sin embargo, ultimamente nos ta tuma nota cu, talbes pa motibo di campaña electoral tambe, mas asunto no corecto ta cuminsa sali. Y no di cualkier luga, sino di e mero seno di gobernacion na Bestuurskantoor.
Por ta cu, en bista di un posibilidad cu na november tin un otro gobierno sinta eyden, tin mas hende ta tuma e decision pa divulga informacion interno cu ta pone e actual gobierno den un luz negativo? Recientemente nos a haya e famoso ‘corant’ cu e picanan mayor di nos mandatario encarga cu infrastructura den asunto di emision di tereno, di cual a core bisa cu e ta basa riba falsificacion, pero esey ta algo cu por comproba facilmente. Si ta falsificacion, anto e caminda pa cana ta bay Ministerio Publico cu un denuncia, pasobra riba su mes e no ta algo menor pa falsifica documento pa acusa un mandatario, of no? Pa nos ‘suerte’ ademas e asunto di tereno ta algo cu ta en todo caso debidamente registra den varios registro publico y ta haci cu nos por comproba lihe ta ken ta gaña.
Un simpel ehemplo: si un persona ta haya un tereno o un opcion, pa e tiki placa cu caha di gobierno ta haya, anto e ta bira bende pa cien miles di dollar, un ministro por simplemente declara cu e no sa di nada? Pero tur hende sa, cu bo no ta duna ningun hende un tereno practicamente regala, pa e bira bende y keda cu un ganashi miyonario. Anto e ta bisa cu e no ta ‘privilegia’ e persona. Por ta cu ta e periodista tabata fout di uza e palabra ey, uno mas simpel y critico lo tabata miho, pero lo no a cambia e asunto. Pero manera nos a bisa mas biaha, awendia nos tin ‘follow the money’. Di e banda ey mester bisa cu tin speransa, pasobra mescos cu den otro pais autoridadnan hudicial, sigur den e intercambio di conocemento y cooperacion cu autoridadnan Hulandes, ta haya mas conocemento den e manera con baho mundo ta opera, sigur den e trafico di placa sushi.
Mas y mas nos tambe ta haya di atende cu crimen organisa cu a penetra den gobernacion, manera nos por lesa practicamente tur dia di e acontecimentonan den e paisnan di nos continente. Nos ta miho?
