Recientemente a keda publica riba website di noticia 24ora.com cu husticia lo a entrega bek computernan di Minister Paul Croes despues cu esakinan a keda confisca pa motibo cu e mandatario ta wordo sospecha di varios delito, entrenan corupcion. Segun e reportahe haci pa 24ora.com, Landsrecherche a entrega bek un BlackBerry, 5 computer y usb stick cu lo a wordo tuma for di su kantoor.
Bon dia Aruba a tuma contacto cu vocero di Ministerio Publico Ann Angela cu e pregunta con mester interpreta e noticia ya cu segun e articulo di 24ora.com cu door di a entrega bek e materialnan esey significa cu no tin investigacion of cu no tin “nada” riba e minister. Den un reaccion cortico Sra. Angela ta bisa “Ta posibel cu cosnan a bay bek pero nada cu a wordo tuma den beslag cerca Paul Croes no a bay bek.”
E caso aki ta un caso cu a hala hopi atencion desde poco mas cu dos luna pasa y ta algo keto bay hopi comenta den pueblo. Abogado di e minister tambe a duna di conoce den un entrevista cu e website di NoticiaCla cu pronto lo tin un conferencia pero te na e momento aki esaki no a tuma lugar.
