ORANJESTAD – Otro siman, dia 14 pa 17, Aruba lo ta sede di e conferencia PAMAC (Platinum Associate Member Advisory Council Conference) di Florida-Caribbean Cruise Association (F-CCA).
Aruba Tourism Autority ta considera esaki como un oportunidad pa ilustra avancenan na Aruba. ATA hunto cu socionan local a prepara un programa pa brinda participantenan di e conferencia e mesun experiencia cu Aruba tin di ofrece na pasaheronan crucero.
Mario Arends Cruise Manager di ATA: “Esaki ta un oportunidad pa showcase Aruba su progreso como cu esaki ta e ‘decision makers’ pa loke ta e industria di crucero y nan por tuma e decision di inclui of no inclui un destino. Nos sa cu tin hopi plannan pendiente pa desaroyo di puerto na Oranjestad pa loke ta cruceronan; nos kier mustra cu Aruba ta sigui desaroya y ‘step up’ y nos ta cla pa ricibi nan pasahero y naturalmente e barconan.” Esaki, segun sr. Arends, ta parti di e trabou di sigui posiciona Aruba como un destino hopi preferencial y hopi gusta di parti di turistanan crucero.
Total lo tin 83 miembro, 11 empleado di F-CCA, y 47 invitado na e conferencia. E participantenan aki lo haya oportunidad pa conoce nos isla por medio di tours den Parke Nacional Arikok, den centro di ciudad, incluyendo Caya Betico Croes.
Michelle Paige, president di F-CCA a papia di interes cu su miembronan tin den Aruba: “Den e estudio di impacto economico cu F-CCA a haci na 2015, Aruba consistentemente a alcansa e top 5 entre e 35 destinacion den termino di satisfaccion. Aruba y e industria crucero tin un sociedad tremendo dor di tur e cosnan cu Aruba a percura p’e pa sigura cu Aruba ta na cabes di ofrece un experiencia satisfactorio na e pasaheronan crucero. E conferencia ta sirbi pa bin traha hunto y experiencia Aruba pa nan mes y asina, un biaha mas, haya e primicia di tur e cosnan nobo y emocionante cu Aruba ta haciendo.”
PAMAC ta un evento cu F-CCA ta coordina pa su miembronan platinum y liñanan crucero keda na ‘forefront’ di informacion riba tanto e industria y su miembronan, como tambe destinacionnan, mientras cu ta haya maneranan pa maximalisa e beneficionan pa tur. F-CCA ta un organisacion comercial no lucrativo cu ta consisti di 19 miembro di liñanan crucero operando riba mas cu 100 barco den e awanan di laman di Florida, Caribe y Latinoamerica.
