Riba e resultado di e prome kwartaal di 2017, Banco di Seguro Social (SVb) ta observa cu e fondonan di seguro di behes y seguro di malesa ta comportando su mes manera economia a wordo pronostica pa Banco Central di Aruba. Esta mas positivo.
Den e prome kwartaal di e aña aki e fondo di seguro di malesa a cera cu un saldo positivo di 4.6 miyon florin. Esaki a pesar cu e gastonan den e prome kwartaal a subi pa motibo di e aumento di 2,35% cu a wordo duna ariba e pension di behes na inicio di aña aki. Tambe despues di hopi aña, e fondo di seguro di malesa a cera e prome kwartaal di 2017 cu un cifra positivo di 1 miyon florin
Director di SVb, Edwin Jacobs a indica cu si nos ta compara e prima of entrada di e aña aki cu esun di aña pasa cu a wordo colecta den e mesun periodo door di Servicio di Impuesto Aruba (SIA), na 2016 entrada tabata core 7% atras den e prome kwartaal di loke a wordo pronostica. Mientras cu e aña aki den e mesun periodo, entrada ta coriendo 0,7% di loke BCA a pronostica cu e ta considera un margen practicamente nulo.
Sr. Jacobs a splica cu ora cu nan a proyecta entradanan di primanan corespondiente, esaki a wordo haci a base di un modelo cu ta depende di e GDP cu a wordo pronostica pa Banco Central di Aruba. “E ta un indicacion cu economia e aña aki ta desaroyando den e direccion cu Banco Central a pronostica. Y esey ta un noticia positivo pa nos”, el a declara na e medio aki.
Pues a base di e comportacion actual di nos economia e posibilidad ta grandi cu SVb lo cera e aña manera e organo aki a pronostica den nan presupuesto te hasta cu un surplus chikito di 2,5 miyon florin riba fondo di seguro di behes. Despues cu e fondonan aki, specialmente e fondo di pensioen di behes y di malesa- pa basta aña a yega di confronta problema cu deficitnan locual a demanda un serie di reforma, actualmente nan ta stabiel asina director di SVb a sigura na Bon Dia Aruba. “Nos ta mirando e efectonan positivo di e reforma aki”, el a bisa.
Un factor tin di haber cu e cantidad di participantenan nobo di e fondo di pensioen behes a bira mita, y esaki tin su efecto positivo riba e finansa. Sr. Jacobs a aclaria cu den e prome mita di aña, semper no tin participantenan nobo ta drenta por lo tanto e resultado ta un poco mas halto y mas positivo. Ya den e segundo mita di aña cu e participantenan nobo di e fondo di pensioen ta cuminsa drenta e resultado ta bay cuminsa baha.
Algo cu e ta cualifica importante pa tur e fondonan administra pa SVb, ta e desaroyo di nos economico. Hopi biaha cu e banco di seguro social aki ta facilita proyeccion tanto na IMF, Fitch y Standard & Poor’s. SVb ta enfatisa cu e direccion cu nan ta pronostica y proyecta nan fondonan, ta locual e gastonan ta bay cana. Esaki a base di nan experiencia di e ultimo 8 aña.
“Semper nos ta pidi cautela ora cu ta husga e entradanan cu nos ta proyecta. Pasobra nos ta asumi algo pero e supuesto ey tin hopi incertidumbre cu ne. Pero e gastonan, e incertidumbre ta menos”, el a indica. El a agrega cu tanto e margennan di eror riba e gastonan ta uno chikito y precies, pero entradanan ta keda un reto semper. E ta e reto di e pais ariba su mes pa henter sector colectivo e reto ta keda semper e proyeccion di nos GDP.
Sr. Jacobs a mustra cu locual ta keda un incertidumbre grandi den nan proyeccion ta entrada, ya cu e ta depende di e GDP. Banco Central a dicidi di proyecta nos GDP pa un periodo cortico. Nan no ta proyecta mas cu un aña pasobra nos situacion economico ta uno cu no por pronostica pa basta aña. Pa ehempel, aña pasa a wordo pronostica un crecemento economico, pero no a logr’e sino cu mas bien den termino nominal tabatin krimp economico.
