Ultimo cifranan di Aruba Tourism Authority (ATA) ta mustra cu e turismo ta sigui baha na Aruba: di januari te cu april 11,9% menos compara cu e mesun periodo aña pasa.
ATA ta duna e cifranan di april unda ta mustra cu e cantidad di turistanan compara cu april 2016 a baha cu 1,9%, locual ta 1.908 bishitante menos. E aña aki 360.480 turista a bishita nos isla. Positivo segun e agencia ta cu e turismo for di nos mercado principal ta aumentando. Na april turismo for di Merca a subi cu 13,1% compara cu april aña pasa. For di Canada 28,4% mas turista a bin Aruba.
En general turismo for di Norte America a crece cu 13,9% na april. Pa e prome 4 lunanan, e continente aki a subi cu 9,3% pa turismo pa Aruba.
Latino America a baha cu 40,4% di cual Venezuela a baha cu 63,9% compara cu april aña pasa. Colombia a subi cu 94,9%. Pa e prome 4 lunanan, turismo procedente di Latino America a baha cu 53,8%. Pa loke ta Europa por nota un aumento di 31%. Hulanda a aumenta cu 9,5%, y Gran Britania a aumenta cu 162,2%. Pero mester tene na cuenta cu Europa ta cubri solamente 7,4% di turismo pa Aruba di e total (Merca:72,3% y Latino America: 17,4%)
Pa e prome 4 lunanan, Europa a trece 10,8% turista mas pa Aruba compara cu e mesun temporada na 2016.
Turismo crucero
Durante april 2017, 63.221 pasaheronan crucero a bishita nos destinacion riba un total di 28 diferente barconan crucero, segun ATA. Compara cu luna di april aña pasa, turismo crucero a crece cu 25% (april 2016 Aruba a haya 50.579 bishitante for di 26 crucero). En total pa e prome 4 lunanan di 2017, Aruba a ricibi 344.144 pasaheronan crucero for 151 diferente barco, un aumento total di 4,2%.
Hotelnan
Segun Aruba Hotel and Tourism Association (Ahata) pa e luna di april, e ‘Average Daily Rate’ (ADR) a aumenta cu 16,9% compara cu april 2016. Esaki den cifra ta US$ 215,46 na 2016 compara cu US$ 251,94 pa 2017. E rendimento pa camber disponibel, e asina yama RevPAR a aumenta cu 26,9% di US$ 170,96 na 2016 pa US$ 217,02 na 2017. E anochinan ocupa pa camber a aumenta cu 10,3%.
E cifranan menciona akiriba ta consecuente e hecho cu Semana Santa tawata na april compara cu aña pasa cu e tawata na maart. En conexion cu esaki, en general e prijs pa camber ta mas halto na april cu na luna di maart. Ademas, Tropicana Resort & Casino a habri 53 camber adicional na fin di december 2016, cual ta aumenta e cambernan disponibel pa april 2017 compara cu e mesun luna di aña pasa.
Aruba den region Caribense
No obstante e caida di e mercado Venezolano, Aruba su turismo ta permanece stabil y pa cu e prome 4 lunanan di 2017. Aruba –den comparacion cu Barbados, Cancun, Cayman Islands, Curaçao, Dominican Republic, Jamaica, Puerto Rico y United States Virgin Islands ta sobresali den Caribe como un di e destinacionnan mas exitoso debi na un averahe di ocupacion di cambernan di hotel cu 85.5%. Ademas Aruba a sobresali pa loke ta rendimento pa camber disponibel cu un crecemento di 10.5% den RevPar te cu april 2017, asina ATA ta bisa.
