Cifra no ta bisa tur cos

Den e debate politico crecemento economico ta hunga un papel importante. Depende si ta apoya gobierno o oposicion, ta haya cu e cifranan general ta apoya o desmenti un avance economico den e ultimo aanan. Mientras cu ta importante pa hiba e debate aki, nos tambe ta parti di esey como medio di comunicacion, e ciudadano individual talbes no ta reconoce su mes den loke cifra ta mustra. Y den cierto sentido nan tin rason. Ta facil pa nos referi na cifra general publica pa institucionnan serio di nos pais, di cual por saca conclusion, por ehemplo, cu cos no a bay asina malo, mirando e circunstancianan internacional y local. Pero tur esey no ta loke e persona individual ta sinti; e no tin e placa di Banco Central, pero mester lidia cu loke su salario, pa mayoria hopi modera, pa make ends meet.

Cu nos pais hunto a produci casi cinco mil miyon florin aa pasa, no ta bisa nada ta con cos ta cu e cartera di tal persona. Pa maneho di un pais ta sumamente importante pa haya sa con e prosperidad cu hunto a produci, finalmente a keda reparti. E ganashi a keda den man di e empresanan mas grandi y poderoso di nos economia, Of un parti grandi a bay pa e empresanan mediano y chikito, Den cartera di esunnan cu ta biba di nan salario, Ken a probecha, ken a mehora nan situacion, Y ken no, Den un debate serio, completo, nos mester por bay den e detayenan ey.
Kico ta pasa si nos confronta un persona cu e cifranan di inflacion di ultimo aanan, cu tabata bastante modera, hasta aa cu deflacion, inflacion inverso cu ta aumenta balor di nos florin. Por ehemplo, ban bisa cu gasolin y diesel a bira mas barata pa motibo di e situacion riba mercado internacional. Esey ta interesante pa e persona cu tin auto& y si bo no tin, pasobra bo salario no ta alcansa pa esey, Loke abo cu ta haci uzo di bus a mira ta un aumento drastico di e carchi di bus. Claro cu ta defende esaki cu e argumento cu Arubus mester por ta un negoshi rentabel, preferiblemente cu ganashi& pa gobierno haci kico cu ne, Como persona cu cartera smal bo a haya un apoyo di gobierno den forma di e reparatietoeslag, pero ta sigur cu tur doo di trabao ta paga esaki, Y si nan paga mes, e aumento di carchi di bus pa un hende cu ta biba na San Nicolas y mester bay traha den area di hotel, ey so caba e toeslag a bolbe bay den caha di gobierno. Anto bo no a ni come ainda& Y, ta ken atrobe a bin riba e tremendo idea di hedge e prijs di fuel oil pa WEB na casi $100 pa bari pa varios aa, Aki ta tur, cu o sin auto, a haya golpi.

Tin mas cos. Por discuti su utilidad, pero gobierno a introduci e seguro di pension obligatorio pa sector priva. Bunita gesto, pero esaki a saca 6% di tur salario bruto for di cartera di nos tur. Cu tempo, esaki por resulta positivo den forma di extra pension, pero a pensa riba control, Cuanto empresa ta tuma e placa di e empleado, pero no ta pagando nada pa varios aa caba, Gobierno lo a keda contento, pasobra e companianan grandi di seguro, cu ta brinda e servicio di organisa e seguro, tin miyones acumula na prima, cu nan mester por inverti. Kico pa haci, Cumpra bono di gobierno, facilitando asina e acceso na placa local pa gobierno. Pero kico ta bay pasa despues si no bin un control adecua, Ken ta bay compensa e trahado cu no por yuda cu su doo di trabao a keda aa largo sin paga nada, Y ken ta responsabel pa e control, Segun e ley e persona cu ta ministro encarga cu financia. Nos a yega di tende cu el a sikiera toca e tema, No, toch, E miles di persona perhudica desde cu a introduci e ley, lo bay corda riba esaki ora nan ta bay vota, Ken ta bay salvaguardia nan interes den e proximo gobierno, Pasobra ban ta franco, nos nunca tabatin tremendo control riba derecho di trahado, pero e gobierno aki a gana premio di laga control pa su cuenta. No ta poco dia pasa nos ta tende cu awor no mas ta bay eherce control riba e uitzendbureau nan cu aparentemente lo ta abusando di e trahadonan cu nan ta emplea temporalmente, Pero, no ta di 2013 a introduci e ley riba e tipo di mediacion pa trabao aki, Bo mester cuatro aa pa yega na e conclusion cu tin abuso ta tumando luga, si cualkier persona cu dos placa di tino por a bisa bo di antemano cu esaki ta bay sucede.

Nos ta spera cu den e debatenan cu ta bay bin, nos no ta bringa solamente tocante GDP nominal o real, CPI, o loke sea, pero ta dedica atencion berdadero na e situacion dificil di poder di compra, specialmente di esunnan cu entrada mas chikito.