Ayera WEB a inicia e fase di construccion di Sunrise Solar Park durante un celebracion di groundbreaking. Sinembargo e tereno cu nan ta huur di Refineria di Aruba (RdA) ta uno contamina y no tin un permiso a base di ley vigente pa cuminsa e construccion.

Segun di ley di Hinderverordening pa inrichtingen manera e parke solar, mester un permiso di hinder. E ley ta rekeri tambe cu mester entrega un peticion y haci esaki publico pa asina entre otro pone e habitantenan den bisindario na haltura. Nan tin e derecho pa entrega bezwaar. Den caso cu lo otorga e permiso, mester entrega peticion tambe pa un permiso di construccion (bouwvergunning) unda tambe tin e posibilidad pa ciudadanonan bay den bezwaar.

Bon Dia Aruba a puntra WEB over di e permiso. E vocero ta splica cu WEB mag di haci uzo di e tereno (di 90.000 m2) pa pone panelnan di solar. Nan a haya aprobacion di Refineria di Aruba. E compania estatal aki tin e tereno aki como erfpacht, Pais Aruba ta doño di e tereno aki cu ta situa riba e tereno di refineria. WEB y RdA a haci cierto palabracion riba e uzo di e tereno, e vocero ta bisa. Den caso cu mester di un hindervergunning, lo pidi esaki. Bon Dia Aruba a haci preguntanan adicional como cu ley ta prescribi cu mester di e permisonan menciona prome cu por cuminsa cu construccion. Aworaki RdA tampoco tin e permisonan aki.

Dump ilegal di asbest
Un otro punto importante ta cu net e area scogi ta unda Valero a dump asbest ilegal. RdA a haci palabracion cu e doo anterior aki di e refineria, pa limpia e asbest. Pero manera Bon Dia Aruba a publica varios biaha, dumpmento di asbest of otro substancianan cu ta malo pa salud, hende y animal, no por riba e tereno di refineria. Asina RdA a autorisa algo cu ta bay contra su permiso, e hindervergunning cu ta conta pa nan momento cu Valero a traspasa e refineria y su tereno pa gobierno y RdA. Pues e dump di asbest eynan ta ilegal. Nos a puntra WEB kico nan ta bay haci cu e tereno contamina. E vocero a bisa nos cu pregunta riba e situacion subsuelo y otro preguntanan en conexion nos mester dirigi na RdA. Pasobra WEB ta uza e tereno solamente.

Nos tambe a trece dilanti cu tin diferente proceduranan canando, entre otro uno penal, di habitantenan di Lago Heights contra e dump ilegal di asbest. E habitantenan aki ta hopi preocupa cu e situacion y efectonan pa nan salud. Como cu e asbest segun nan tampoco ta bon warda. WEB su vocero ta comenta cu nan no ta di haltura di e proceduranan aki. Riba potret por mira e evento di grounbreaking den entre otro presencia di Richard Brandson di Carbon War Room, nos gobernador y mandatarionan.

Den un relato riba e proyecto WEB ta informa entre otro: E inicio oficial di e proyecto aki di 5.9 MW bou di e nomber di Sunrise Solar Park, ta un logro grandi pa WEB Aruba. E logro aki ta trece e compania di awa y energia mas cerca di meta pa cumpli cu e vision pa ta mas berde, mas limpi y liber di fuel oil. Na mes momento, e inversion di 16 miyon florin ta representa otro logro grandi pa e compania; Pa prome biaha den historia WEB Aruba lo ta doño di un proyecto di e magnitud.