For di aña pasa Stichting Parkietenbos a tene diferente reunion cu gobierno. Tabata durante 3 ocasion cu minister presidente Eman, minister Mike de Meza hunto y nan team, pa asina informa nan di e situacion desastroso y peligroso di e Dump na Parkietenbos. Nan a priminti un solucion pero 5 luna a pasa sin algo ta wordo haci.
Esaki Stichting Parkietenbos a declara y awor ta duna gobierno un ultimatum. “Den e barionan cerca tin un cantidad di caso di muchanan y nan mayornan cu ta malo, hende cu cancer straño cu mester a muda hunto cu nan yiunan pa otro bario. E habitantenan ta hopi rabia pasobra ta papiamento so tabata tin te awor, ningun atencion y accion serio di departamento concerni tampoco a tuma luga. Awor e fundacion a tuma e paso pa duna gobierno un ultimatum di un siman pa reuni y presenta cu solucion serio y rapido. Si esaki no sosode lo denuncia gobierno di Aruba na nivel internacional cu nan ta violando e tratado di Cartagena y su protocolnan y cu nan ta hincando salud di henter un pueblo den peliger.”
Aña pasa y e aña aki hopi ta e famianan cu a raporta cu nan a bira malo, nan yiunan a haya asma, otro a haya cancer y tin otronan cu a haya alergia cronico segun e fundacion.
“Stichting Parkietenbos ta preocupa pa e habitantenan di e bario y pa e trahadonan cu ta traha rondona pa e polucion. E fundacion a hala atencion di ministronan di gobierno na multiple ocasion y a ser priminti cu nan lo traha riba un solucion rapido a corto plasa y uno a largo plaso. E aña aki mester a habri cu implementacion di e solucion a corto plaso. Ya 5 luna a pasa y awor ta 7 aña y mei caba gobierno a neglisha e Dump y e planta di procesamento di sushi estableci na e sitio.”
