Electro-stress tambe conoci como Electro-hipersensibilidad (EHS) ta causa angustia y perdida di calidad di bida den un number creciente di hende. Segun calculacion nobo, entre 3% y 5% di e poblacion ta electro-sensibel (e prome etapa di EHS).

Un estudio piloto realisa na Aruba a demostra cu aunke nos ta un isla chikito hancra den lama Caribe, tambe nos poblacion ta vulnerabel na e fenomeno aki di nos era moderno cu ta e electro-sensibilidad.  Pa ehempel e estudio a demostra cu e impacto di e yegada di cruceronan den nos waf ta produci un cambio of efecto di electro-sensibilidad den e area di Playa di casi 1000%.

Electro-sensibilidad
Personanan cu ta sufri di EHS ta manifesta varios sintoma comun, sin cu nan tin problema di salud of sin cu nan ta bao di tratamento medico. EHS no ta un malesa; e ta un condicion temporal den e curpa relaciona cu nivelnan halto di electro-polucion den ambientenan specifico. E topico aki ta uno cu tin atencion mundial, caminda Nacionnan Uni (UN) tambe ta envolvi den dje. Ya caba for di dos decada pasa, institutonan internacional y prestigioso manera Federacion Hulandes di Electro-hipersensibilidad ta bin realisando estudio riba e sintomanan basico of comun cu ta afecta un hende of poblacion riba hipersensibel na e electromagnetismo, ya sea debi na fuente di coriente y/of microonda. Na Suecia pa ehempel ta wordo calcula cu 300 mil persona ta sufriendo actualmente di electro hipersensibilidad (EHS), y na Inglatera ta wordo calcula cu un 1 miyon hende ta sufri di EHS.

Ta asina cu Jose Machado di e compania local Noxtak ta realisando un encuesta na Aruba via plataforma digital(Nan Facebook-page ta: Noxtak). E informacion colecta lo wordo administra confidencialmente cu e proposito pa uza esaki den investigacion y colaboracion cu Nacionnan Uni y tambe den cuadro di e cumplimento di e 17 meta di sostenibilidad di 2030.

Proyecto piloto na Aruba
For di 2013, Noxtak a realisa un proyecto piloto di investigacion cientifico na Aruba pa evalua e nivel di electro-polucion den nos isla. Nan a realisa evaluacion ambiental di henter nos isla. Nan a realisa mas cu 1000 evaluacion unda nan a determina ki area di nos isla tabatin mas y menos nivel di electro-polucion pa causa di electromagnetismo.

Den e area di mas nivel, nan a entrevista cierto cantidad di persona. Nan a realisa estudio den e casnan di e personanan aki. Aña pasa, Noxtak tabatin oportunidad di comparti cu e departamento di Sostenibilidad di Nacionnan Uni cu ta maneha e asunto di e plan di sostenibilidad di nos isla, unda nan a presenta e resultado preliminar.

El a laga sa cu un isla manera Aruba tambe por presenta problema di electro-polucion, y no necesariamente ciudad grandi, locual a hala atencion di e instancia concerni di UN. Pues un isla manera Aruba cu un poblacion chikito por a presenta problema similar di igual magnitud cu un metropoli grandi manera London.

 

Electromagnetismo aumenta na St. Cruz

Sr. Machado a bisa cu a base di e proyecto piloto cu nan a realisa den henter nos isla, na inicio di 2017 nan a sinta pa evalua un biaha mas durante casi un luna e resultadonan. Nan tabata un cantidad grandi di data pa nan evalua y studia. E resultado ta mustra cu tin sitionan na Aruba unda electromagnetismo a bira 300% mas grandi durante e ultimo 4 añanan. Un districto cu electromagnetismo a aumenta ta Santa Cruz. “Na Santa Cruz tin zona unda tin un exposicion grandi di electromagnetismo”, e ta bisa. E causanan aki tin di haber entre otro cu un mal planificacion urbano electrico cu a crea electro-polucion.

E echo cu pa ehempel fuse box /breaker box ta den e camber principal di e cas lo por bira un fuente di electro magnestismo. Mientras cu estudionan serio na Suecia cu a mustra cu e tipo di risico aki por produci un serie di efecto manera insomnio, cansancio cronico, iritabilidad, tristeza sin motibo, nerviosismo etc. cu ta afecta bo salud na largo plaso. P’esey e ta haya cu ta importante pa educa nos poblacion riba e topico aki.

“Esaki no ta wordo trata como un malesa, sino mas tanto como un descapacidad funcional. Pasobra e problema ta presente den e ambiente. Ora cu e nivel di electro-polucion ta bira menos den e ambiente, tur e sintomanan ta disparce”, asina sr. Machado ta declara. E echo cu e situacion aki no ta wordo maneha como un malesa ta haci dificil e tipo di estudio rond di Electro-hipersensibilidad (EHS).

Encuesta
Algun di e fuentenan mas comun di electro-polucion of contaminacion electronico di nos medio ambiente ta e kabelnan di coriente di tension halto, fuse box /breaker box, aparato electrico pa cas y tur aparato electrico cu ta produci camponan artificial contamina. Otro fuente comun ta e mastnan di telefon celular, cordless phones y Wi-Fi routers instala den e casnan, cu ta manda señal di microonda permanentemente cu DPA (alteracion di pakete di data) cu ta contamina e medio ambiente cu carganan desbalansa. Normalmente e sintomanan referi na dje den e encuesta aki ta relaciona cu diferente tipo di malesa, efectonan secundario door di tuma remedinan y diferente tratamento medico.

E proposito di e encuesta aki ta pa identifica e presencia di varios di e sintomanan aki den personanan cu no ta malo di salud of cu no ta bao un tratamento medico. Nos por describi e sintomanan manera espontaneo, sin causa conoci, cu e obhetivo pa identifica posibel alteracion cronico, sensibilidad y/of stress den e curpa, relaciona cu electro-polucion.

Encuestanan similar tabata pidi pa indica cuanto ora di uzo diario e hendenan tabata mantene cu aparato electronico y sistema di telecomunicacion (Telefon celular, Wi-Fi, Bluetooth, etc.). E rason tabata cu solamente den usuario compulsivo e sintomanan aki (sin causa conoci) tabata aparece y sin ta relaciona cu cualke tipo di enfermedad specifico.

Pero e biaha aki nan a dicidi di bin cu un tipo di encuesta mas senciyo teniendo na cuenta tur loke den e consenso cientifico ta wordo considera como sintomatologia di Electro-hipersensibilidad (EHS).

Antes e encuesta a wordo traha a base di peliger laboral di e trahadonan cu tabata traha den e sector di telecomunicacion of esunnan cu ta expone su mes na fuentenan electrico of electromagnetico. Pero durante e ultimo añanan e problema aki a bay den un dimension mas grandi debi na e uzo masivo di tecnologia wireless.

A base di relacion internacional cu ta studiando e asunto aki di Electro-hipersensibilidad (EHS)  nan a dicidi di realisa un unico encuesta global pa asina por descubri cu incluso persona cu no tin niun relacion cu e medionan di telecomunicacion of operacion den planta electrico cu sorto di sintomanan nan ta presenta cu no tin relacion na un malesa specifico. Esaki lo permiti un estudio mas avansa.

Actualmente (2017), e nivelnan di electro-polucion combina cu señal di telecomunicacion sin waya y conexion electrico multipel, a eleva e exposicion publico na nivelnan unda cu ya ta posibel cu personanan cu ta uza tiki di e tecnologia moderno aki, por desaroya igualmente un alteracion cronico den nan curpa.