E caso di e directiva nobo contra e lider di PDR y otro afiliadonan lo tuma luga riba 13 di juni. Como cu 22 di juni ta e fecha final pa partidonan entrega lista pa eleccion, lo no ta sigur si e veredicto lo bin na tempo pa e grupo nobo.
Despues cu lider di e Partido Democracia Real (PDR) Andin Bikker a anuncia cu e lo join Otmar Oduber den un cooperativo y asina lansa un plataforma politico nobo, a surgi un problema a base di desacuerdo entre coleganan pa loke ta rumbo di e partido. Desde un inicio caba e tabata hopi cla cu e desacuerdo aki lo termina den un bataya legal.
E caso
Na luna di januari e aña aki, un grupo nobo a wordo forma di cual ta consisti di entre otro candidatonan cu a aparece riba lista di 2013 pa PDR, Alonso Tromp y Lisette Gomes. E grupo aki a tene un asina yama Algemene Leden Vergadering (ALV) e tempo ey y a sigui na entrega un carta di terminacion di miembresia na entre otro e propio lider di PDR. Segun e grupo nobo, e miembronan cu a dicidi di bay cu partido POR hunto cu Bikker a viola Art. 5 inciso 8 di e statutonan di PDR cual ta nifica cu nan no lo por forma parti mas di e partido. Cu e pensamento di e terminacion di e miembronan aki, e grupo nobo a forma un quorum di 10 persona, eligiendo un directiva nobo. E directiva nobo a bay entrega nan inscripcion na Camara di Comercio (KVK) kende a opta pa no tuma esaki sino pa laga e decision den man di corte.
Un di e prome comentarionan cu sr. Bikker a duna e tempo ey tabata “Nos no ta acepta e reunion aki, e ta un reunion ilegal.” Segun sr. Bikker e grupo aki ta un grupo cu no lo a haya nan kier y door di esey ta actuando asina. E lider di PDR a y ta keda para riba su punto cu e grupo nobo aki no tin ningun base legal pa para riba dje.
Corte
Den un reaccion pa Bon Dia Aruba, sra. Gomes ta splica cu e caso ta programa pa tuma luga dia 13 di juni awo. El a splica cu nan lo tin un ALV y lo tin un rueda di prensa pronto pa duna mas detaye. Tumando na consideracion cu huesnan ta tarda un promedio di dos siman prome cu duna un sentencia, a haci e pregunta na sra. Gomes si esaki no lo afecta nan den caso cu nan gana, ya cu 22 di juni ta e ultimo dia pa entrega lista di participacion pa eleccion 2017. “Nos a pidi pa nan (corte) hala e fecha pa mas prome pues nos ta wardando contesta.”
Nos a acerca Sr. Bikker pa puntra con e situacion ta pa su banda y e ta splica cu su pensamento y ponencia ta keda igual y cu p’e no tin nada nobo. E ta di pensamento cu huridicamente no tin nada pa discuti pasobra cu nan (e grupo nobo) no tin base y cu mester djis warda e caso tuma luga dia 13 di juni. Eta sigui splica cu e grupo nobo a acepta por escrito cu documentonan entrega na corte cu nan nunca tabata miembro di PDR. “Nan ta sali for di e punto di bista cu door cu nan tabata candidato, automaticamente nan mester wordo considera como miembro pero esaki no ta corecto,” sr. Bikker ta bisa.
Status PDR
Nos redaccion a tuma nota cu recientemente a bin un cambio na e edificio na Noord cu tabata wordo uza pa PDR como cas di partido. Ora cu a anuncia e colaboracion entre sr. Bikker y sr. Oduber den lansa e partido nobo POR, e cas di partido a wordo geverf cu mita logo di PDR y mita di POR pero awor esaki a wordo geverf completamente na POR. A puntra sr. Bikker si esaki nifica e fin di PDR, pero e ta splica cu e organisacion ta keda existi y ta forma parti di POR pa medio di e protocol di colaboracion. “E sede no ta na nomber di Democracia Real. Anos por haci cu e edificio locual nos ta haya ta bon.”
