Servicio di Impuesto di Aruba (SIA) ta bin hayando reclamo di nan clientenan cu nan plachi di number di auto ta perdiendo nan color; y nan ta confrontando problema cu polis keriendo cu e ta plachi falsifica. Ta trata mas tanto e planchinan extra cu a wordo traha di e serie di number di 62 mil, 63 mil y 64 mil.
Vocero di SIA, Mervelyn Romano a declara cu nan ta comparti e situacion aki cu nan cliente; ya cu esaki ta crea un situacion basta fastioso. SIA a tuma contacto cu e compania cu ta entrega nan e plachinan di number y “berdad a keda constata cu e calidad di e verf cu a wordo uza no ta e mesun calidad di custumber”.
Pa atende cu e situacion aki, e compania cu a elabora e plachinan di number a palabra cu SIA cu tur e plachinan aki cu ta perdiendo color pa e clientenan acudi na oficina principal di SIA na Camacuri.
Di e forma aki nan ta constata formalmente e situaciona di e color. SIA e ora ta informa e compania pa nan traha otro plachi completamente nobo pa e cliente ey. E cambio aki no tin costo adicional, segun sra. Romano. “Ta importante pa e cliente tin su plachinan den bon condicion pa motibo cu ta hopi importante cu e number ta visibel specialmente pa cuerpo di polis.”
Unabes cu e plachi ta cla nan ta informa e cliente pa bin pasa busc’e den e edificio pafo, unda normalmente SIA ta otorga e plachinan. Eynan e cliente mester entrega e plachi bieu cu a perde color y e ta ricibi su set di plachinan nobo.
