Ayera a culmina e prome 14 dia cu Ley di Referendum ta stipula pa convoca un referendum pidi pa gerencia di Alhambra Casino. Si niun sindicato a inscribi prome cu mey anochi, esaki ta nifica cu awe Mediador di Gobierno Anselmo Pontilius ta cancela e proceso aki.
Aña 2017 a habri y Gerencia di Alhambra a informa cu un gran cantidad di trahado a retira for di sindicato. Considerando e situacion aki nan a puntra su mes si nan mester sigui negocia e CAO cu un sindicato cu no tin un mayoria di miembro afilia. Mediador di Gobierno Sr. Anselmo Pontilius a declara na Bon Dia Aruba cu na momento cu nan a haya e peticion aki pa convoca un referendum, nan a reuni tanto cu e sindicato STA como cu e compania pa purba di resolve e situacion. Den su rol di mediador, el a laga sa cu e compania a insisti pa convoca un referendum, ya cu e ley mes ta permiti pa e dunado di trabou solicita un referendum.
Pero e sindicato a señala por escrito cu despues cu e compania a pidi referendum, y cu mediador a convoca e referendum, cu nan a logra haya afiliadonan nobo extra. Pa tal motibo el a recomenda ambos partido pa sinta na mesa y continua cu e negociacion di e CAO. Sr. Pontilius a splica cu alrededor di un aña y mey pasa, e trahadonan a pidi e sindicato STA un referendum pa nan representa nan. Den e referendum aki pa departamento e sindicato a haya mayoria. Na 2016 nan a cuminsa cu e negociacion di e contracto colectivo (CAO), pero nunca nan a yega na un acuerdo.
Nos lo tende den e proximo dianan si e partidonan lo sigui e recomendacion di sigui negocia un CAO. Of si nan ta rekeri pa Mediador di Gobierno trece e partidonan hunto y mira si nan por sali for di e proceso di e negociacion di e CAO, ya cu esey ta e discusion cu tin basicamente.
