Mayoria di e clientenan di Servicio di Impuesto di Aruba (SIA) a cumpli cu e pago di impuesto di vehiculo di motor; pero ainda mas cu un 15 mil cliente no a paga e impuesto aki.
E instancia a manda un carta di recordatorio pa esunnan cu tin un debe habri pa bin cumpli prome cu dia 29 di mei cu e pago di impuesto aki. Ya cu nan ta core e risico cu SIA lo cobra un suma adicional pa no cumplimento. Te hasta SIA por bay mas leu di pone confiscacion riba nan pertenencia y/of salario; manera normalmente ta sosode cu otro tipo di belasting ora cu e cliente no ta cumpli cu ne.
Pero e preocupacion cu tin di haber cu SIA ta premira cu lo presenta un avalancha di hende atrobe pa atende cu e asunto aki, manera a yega di sosode na final di 2016 y cuminsamento di 2017. Ya cu ademas di e grupo considerabel cu no a paga ainda of tin un debe atrasa; tambe lo tin un grupo di un 27% cu mester paga e di dos mita di aña 2017. Vocero di SIA Mervelyn Romano a haci un yamada specialmente na e grupo cu ainda no a paga e impuesto aki pa purba di motiva nan pa cumpli cu e pago aki y no laga tur cos te na ultimo ora.
20% no a cumpli, mayoria den categoria A
Den su up date tocante number di auto paga y no paga, Romano a bisa cu un total di 80% di nan cliente a cumpli cu e pago di impuesto di vehiculo di motor. Di e total aki, un 53% di nan clientenan a cumpli cu e pago di e aña completo. Y un 27% a paga cu e pago di e prome mita di aña 2017.
20% e ora no a cumpli cu e pago di e impuesto di vehiculo di motor cu ta representa un total di 15.228 cliente cu no a paga nada mes pa loke ta trata aña 2017, y te hasta añanan anterior cu esaki. Mayoria di esun cu no a paga ta cay respectivamente den e categoria A di autonan particular; sigui pa e propietario di brommer; y e di tres tin di haber cu V-car. SIA a manda e carta di recordatorio cu fecha 15 di mei unda nan ta bisa nan clientenan kico ta e debe cu nan tin habri. Tambe nan ta pidi e clientenan pa haci nan pago di impuesto aki denter di dos siman. E instancia ta recomenda fuertemente pa haci uzo di banco of via e sistema online di cada banco, ya cu e ta alivia e presion di clientenan cu por surgi na oficina principal di SIA na Camacuri of den nan otro oficinanan rond di Aruba. Vocero Romano ta aclaria cu e cliente cu a paga aña 2017 via banco y ora cu SIA ta procesa e pago nan ta ripara cu e tin debe atrasa ya sea di 2015 of 2016, nan ta procesa e pago haci riba e debe bieu prome.
“E cliente no ta hay’e cu e ta perde mucho tempo pa bin akinan pa para den rij prome cu e por haci su pago.” Aworaki SIA ta atendiendo e personanan cu no a haci pago. P’esey nan a manda e carta di recordatorio pa nan cliente atrasa haci e pago no mas laat cu dia 29 di mei awor.
El a haci enfasis cu nan clientenan tin dos siman pa haci e pago di e saldo pendiente cu nan tin habri. Si despues di esey nan no ta haci e pago, nan a bay riba e lista di e candidatonan pa haya un cobransa adicional cu ta casi e dobel di loke nan mester paga pa concepto di e impuesto anual aki.
E ley di impuesto di vehiculo di motor a cambia prome cu fin di aña 2016. Entrante e aña aki SIA a haya autoridad pa saca cobransa adicional pe e clientenan cu no a cumpli.
