Luiz Inácio (Lula) da Silva, un di e politiconan Latino Americano mas carismatico den ultimo 20 aña, kier participa den eleccion di 2018 na Brasil, pa asina purba bira presidente un biaha mas, pero prome e mester supera cinco huicio cu por hib’e prizon.

Lula da Silva, co-fundador di partido di Trahador (PT izquierda) lo ser interoga diaranson na Curitiba pa e hues Sergio Moro, como un supuesto propietario di un apartamento triplex, cu empresa constructor OAS a ofrece na Lula. OAS ta envolvi den fraude na Petrobras, como un pago di fabornan ilegal.

E ex-presidente (2003-2010), cu ta bao investigacion ta nenga tur acusacion, pero si husticia conclui cu e ta culpabel, y e decision ta confirma den tribunal di dos instancia, anto Lula da Silva no lo por participa den eleccion 2018.

Aki tin e conhunto di accion penal cu ta habri contra Lula da Silva:

Apartamento triplex 
Fiscalia ta bisa cu Lula a haya un soborno for di OAS di 3,7 miyon di real (1,16 miyon dollar). Empresa OAS a paga 87,6 miyon na politico y funcionario publico como soborno.

Segun denuncia, empresa OAS a duna Lula da Silva un apartamento triplex na Guaruja, un zona turistico di Sao Paulo. Nan ta sigura cu Lula a financia e acumulacion di su propiedad personal entre 2011 y 2016, inclui den su patrimonio durante a tempo cu e tabata presidente.

Leo Pinheiro, ex-presidente di OAS, a confesa na husticia cu e apartamento tabata reserva y despues e apartamento a ser cambia y reforma pa Lula da Silva y su casa Marisa Leticia, ora cu el a finalisa su mandato. Lula ta sigura cu fiscalia ta papia mentira y cu nan a haya e confesion aki pasobra nan a duna algun soborno.

“Si nan kier mustra cu mi ta e propietario mester tin un recibo, un registro cu notario, un escritura. Si mi no a paga, mi no tin yabi. E empresa a usa e apartamento como un garantia pa varios prestamo cu a solicita na banco, anto no ta logico cu e apartamento ta di mi”.

Instituto Lula
Otro caso cu ta den man di hues Moro y bao investigacion ta relaciona cu e tereno pa construi e instituto Lula. Odebrecht a ofrece 12 miyon di real pa cumpra un tereno na Sao Paulo, caminda nan lo construi instituto Lula, cu ta un obra di su legado politico, como un acuerdo pa distribui soborno cu e partido di trahador a haya.

E transferencia nunca a pasa, pero fiscalia ta considera esaki como un prueba pasobra PT tabatin un cuenta coriente informal di corupcion cu Odebrecht. Segun e acusacion ta considera esaki un delito caba, desde momento cu a haci e propuesta y un posterior aceptacion di soborno. E instituto ta nenga cualkier iregularidad.

E denuncia ta bisa cu Odebrecht a paga un apartamento cu ta situa cerca di e apartamento unda Lula da Silva ta biba na Sao Paulo. Segun denuncia un persona diferente a huur e apartamento na su ex-esposa y “nos tin sospecho cu e apartamento ta propiedad di Lula, y cu el a hay’e como un soborno for di grupo Odebrecht,” e denuncia ta splica.

Avion di combate 
Den e proceso aki Lula ta acusa di labamento di placa y trafico di influencia den e proceso di compra di un avion di combate for di Suecia pa 5.000 miyon dollar, cu finalmente a cumpra durante presidencia di Rousseff (2011-2016).

Segun investigacion Lula da Silva a haya 2.25 miyon real via empresa di su yiu Luis Claudio, pa asina motiva ex-presidente Dilma Rousseff pa cumpra e jet fighter Gripen SAAB.

Den e acusacion aki Lula da Silva ta investiga tambe pa participa y duna un beneficio fiscal na empresa di auto na Brasil.

Compra di silencio
E proceso ta investiga e denuncia di ex-senador di PT, Delcidio do Amaral, caminda e ta bisa cu ex-presidente Lula a participa den un plan pa cumpra silencio di un ex- director di Petrobras cu ta envolvi den fraude den e empresa petrolero.

Lula ta acusa di purba di silencia ex-director di area internacional di Petrobras, Nestor Cervero, hunto cu André Esteves (ex-presidente di BTG Pactual), José Carlos Bumlai empresario y amigo di Lula y Amaral Lula. Cervero tabata casi cla pa firma un acuerdo y pa asina duna informacion tocante funcionamento di red di soborno na Petrobras

Angola
Den caso aki Lula ta acusa di trafico di influencia, corupcion pasivo, labamento di placa y di conforma un organisacion criminal hunto cu Marcelo Odebrecht, entre 2008 y 2015.

Lula da Silva a influencia tambe e politica di financia internacional di BNDES (Banco Nacional di Desaroyo), cu intervencion di otro organismo federal pa asina faborece Odebrecht, e denuncia ta bisa.

Cerca di 20.6 miyon di real a ser presenta como un participacion den negoshi na Exergia Brasil. E empresa ta propiedad di un di su sobrinonan.