Manera nos a informa, e compania Trigas tambe tabata victima di fraude y malversacion hunto cu Romar Trading. Un empleado a wordo kita for di trabao na Trigas relaciona cu esaki y ta bisa cu lo paga bek.
Un empleado di Trigas ta conta nos cu e ta temporalmente tumando cargo te ora cu e doño mes yega otro siman. E no por a duna nos mas informacion y recomenda nos warda riba e doño pa mas detaye na cuanto a wordo horta y kico exactamente a tuma luga.
Ta trata aki di un persona cu posicion halto den e compania Trigas (posibel manager/ supervisor) cu ta involucra den caso di fraude y malversacion liga cu Romar Trading. E empleado cu nos a combersa cu ne ta bisa nos cu e compania ta sigui draai normal. E persona cu a wordo kita aparentemente a bisa cu e ta bay paga bek. Bon Dia Aruba lo ta pendiente cu entre otro Ministerio Publico pa cu e desaroyo di e casonan aki.
Romar Trading
Manera cu nos a publica ayera, Segun Ministerio Publico, e sospechosonan den caso di Romar Trading ta wordo sospecha di falsificacion di documentonan y fraude. Ministerio Publico ta laga sa cu e investigacion ta andando y esaki lo determina precisamente kico tur a tuma luga. Segun director di Romar Trading nan a detecta algun iregularidad un luna pasa y reporta esaki na autoridad. Ta papiando aki di un estafa di mas cu 50.000 florin pero cuanto exactamente ainda no ta conoci. Tin un sospechoso deteni den e caso aki caba anto un otro sospechoso cu ta den libertad ainda.
