Como 42 ciudadano Colombiano a keda expulsa di Peru, pa decision di superintendencia nacional di migracion di Peru, y den coordinacion cu division di stranhero, pasobra nan a viola norma di migracion di Peru.
E grupo di Colombiano a ser captura pa polis nacional den diferente operativo na Lima, Peru y na ciudad di Ica. Nan tabata parti di un banda conoci como “Los Parceros” cu tabata traha bao di un sistema di prestamo conoci como “gota a gota”. Nan victimanan tabata comerciante.
“Segun documento cu a ser confisca, nan tabata presta placa na un interes di 25%, den cual nan cliente mester debolbe diariamente. Si nan tarda pa paga, anto interes lo subi, of nan lo tuma hasta nan negoshi, of por secuestra nan famia,” polis a splica.
Mayoria di e hendenan stranhero a drenta na Peru como turista y nan tabata envolvi den actividad contrario cu ley di migracion, dañando asina orden publico of interno di Peru.
Segun un orden di migracion, e personanan expulsa di Peru, a ser traslada den un avion di forsa aereo di Peru te ciudad di Leticia, na Colombia. Segun e norma aki e hende stranhero cu ta acusa di comete e delitonan, no por bolbe Peru durante 15 aña.
Na aña 2017 gobierno di Peru a castiga mas di mil stranhero, pasobra nan a viola e ley di migracion y pa mayoria a keda castiga cu un salida obligatorio for di Peru.
