E gasto di defensa a aumenta na henter mundo cu 0.4%, segun informe anual di Instituto Internacional di Estudio pa Paz di Stocholm (Sipri): na Asia y Europa gasto a aumenta, y a cay na America Latino y na Africa, apesar di tur problema cu tin riba e continentenan aki.
Merca a subi su gasto militar na aña 2016 cu un 1,7% (alrededor di US$ 6,1 mil miyon) despues di cinco aña di hopi reduccion, pa motibo di e crisis economico y tambe pa e salida di tropa militar na Afganistan y Irak. Despues cu a yega na un maximo halto na aña 2013, e inversion militar na Sur America ta bahando, pa motibo di un bon ambiente di seguridad cu ta reina, aunke e caso di Argentina y Colombia ta diferente, cu 12 y 8,8% di aumento, respectivamente.
Na Venezuela e gasto militar a cay cu 56% y tambe na Ecuador cu -13%, Mexico cu -11% y Peru (-20%). E crisis economico cu tin na Brasil a perhudica su inversion den gasto militar, aunke e pais ta mantene su posicion entre e 15 paisnan di mayor gasto militar, y ta cay di posicion 12 pa posicion 13.
Terorismo, conflicto y otro tension internacional a causa un aumento di gasto militar na Merca y Europa Occidental. Pero poco pais ta alcansa e 2% di Producto Interno bruto (PIB;GDP) cu organisacion di tratado di Atlantico Norte (NATO) ta mantene como norma.
