No ta cuestion cu Departamento di Higiena di Aruba no lo sigui cu nan control estricto riba establecimento comercial di bebida y cuminda rond di nos isla. E echo cu cuminda no a tende mas no kiermen cu e control no ta tumando luga asina directora di e departamento menciona, Yvette Geerman a declara na Bon Dia Aruba. “No! E ta tumando luga, nos ta activo keto bay y nos ta haci nos inspeccion”, el a bisa.
Geerman a laga sa cu nan ta realisando nan accionnan conhuntamente cu otro departamento, ya cu nan ta sigui controla localidadnan. Nan ta bezig y e resultadonan di nan inspeccion ta mustra cu nan ta bayendo den bon direccion. Sinembargo ainda tin algun punto di atencion. Recientemente nan a bin cu un accion grandi caminda nan a pone hopi atencion ariba higiena “pa conscientisa esunnan cu ta den e mundo eynan pa nan mira importancia di higiena”.
Aunke nan ta poniendo atencion riba higiena; pero na final di nan resultado nan ta bay evalua unda mas nan ta bay amplia nan puntonan di atencion. El a splica cu atencion den sentido di pone mas conscientisacion, educacion y coach esunnan cu ta dedica na e sector aki.
Geerman a indica cu como departamento di Higiena nan ta notando caba cu e parti di higiena y limpiesa ta bayendo den “basta bon direccion”, pero ainda tin otro aspectonan cu ta demanda atencion, entre nan, e grado di temperatura pa conserva nan productonan di consumo. Tambe e sitio unda e cuminda mester ta warda of conserva y tambe e parti di preparacion prome cu bo ta prepara e cuminda, cu nan lo pone atencion extra riba dje.
Carchi berde
Pa loke ta trata e famoso carchi berde di salud, directora di departamento di Higiena a bisa cu a pesar di tur control, ainda e ta keda toch un atencion. E ta parti di e regulacion di ley cu ainda completamente tin establecimentonan cu no ta cumpliendo cu nan. Unabes cu nan accion finalisa ya cu nan ta bezig cu otro accion cu otro departamentonan, na lo bin cu e proceso di evaluacion pa bin cu otro puntonan cu ta demanda extra atencion di nos autoridadnan competente.
