Mi hendenan, bon siman! Falta poco pa scol cera pues ami ta riba un conteo regresivo. Ay, mi n’ por warda pa mi yega pa mi trip y basila na mi manera. Sinti e calor di mi dushi hendenan, laga sa cuanto mi ta stimanan. Pero bon, ban papia!
Mi ta comparti mi emocion pa bay Aruba cu mi amigonan y nan no ta comprende mi alegria. Mi amiga ta insisti cu mi mester biaha den Europa y no bay bek pa un rato pero hallo? Mi ta haya falta di mi famia! Mi mester come aros moro Dominicano aworaki! Awo, ta berdad cu mi ta entrevista hopi studiante y pa motibo di esaki mi tin hopi speransa pa Aruba. Hopi ta papia di bay bek y aporta, trece cambio, mehora calidad di bida riba e isla pa otronan. Podise mi ta hinca den un “la la land” cu no ta e realidad.
Pues, pa varia mi a bay papia cu un di e hendenan di mas inteligente cu mi conoce. Mi di cu ne “Kico ta pasando realmente riba e isla? Bo por duna mi poco insights?”. E ta conta mi cu e ta papia hopi cu hende den comunidad, specialmente hende na San Nicolas cual ta e ciudad unda el a crece. E ta bisa mi “Mi por sigura bo Yakari, cu manera cu hende ta pasa trabou dia aden y dia afo lo duna bo contexto pa skirbi no un, pero mil articulo tocante e topico. Mi conoce muhenan cu a te hasta bende nan curpa di desesperacion, muhenan cu “moral” di kende bo no lo pensa cu nan lo ta capaz di haci algo asina.” Pa cuminsa e ta subraya cu e costo di huur na Aruba ta algo cu no ta normal. Mientras salarionan pa comunidad en general no a cambia mucho den transcurso di añanan, tin un grupo chikito di elite cu si a yena nan saco.
Segun e, Aruba ta na caminda pa bira manera Dinamarca y Belgica, pronto hopi tiki hende lo por obtene un pida tereno. Hende lo caba na huur un cas pa resto di nan bida manera hende na China. Otro cos ta e prijs di cuminda cu ta keda subi, na Aruba hopi tiki hende ta planta, e isla ta seco y prijs di awa ta super halto. Esaki ta haci cu nos ta consumi hopi cos cu ta wordo importa sin tene cuenta kico tur tin aden. Nos ta consumi productonan cu ta yena cu kimico. Pues esaki ta keda contribui na e kebrante di salud di nos hendenan. Epidemia di diabetes cu cancer pasobra nos no ta consciente di kico nos ta come. Magicamente, mas Burger King cu Mc Donalds ta aparece tur rond di e isla, pero mester coba den tur mapa pa por haya un restaurant crioyo. Hopi hende ta emigra, laga nan pais cu nan stima a cambio di un miho bida. Nos ta bin Hulanda pa studia pasobra nos tin speransa cu si nos bin bek cu un diploma nos por tin un miho calidad di bida den futuro. Ta duel mi pa sa cu esaki ta e situacion na Aruba awo. Wel, na un manera esaki no ta nada nobo, pero mi no kier nada kita mi gana di bay bek. Mi ta cuminsa cuestiona si pronto, Arubianonan tambe lo emigra den gran cantidad buscando un miho calidad di bida. Si ta Arubianonan lo ta na e otro banda di e medaya. Na Aruba, nan ta husga otro nacionalidadnan cu a bin pa busca un miho calidad di bida, nan ta yama nan ilegal, ladron, morto di hamber.
Si tene na cuenta, cu hopi cu ta legal ta morto di hamber tambe y tin cu haci cosnan deshonesto pa sobrevivi.
