Minister: no tin espacio pa baha impuesto pa stimula economia

Camara di Comercio di Aruba (KvK) a yega di vocifera nan preocupacion riba e caida di nos economia; y falta di actividad y estimulo comercial di parti di gobierno.  Sinembargo minister di Finansa awor ta laga sa cu no tin espacio pa baha impuesto pa asina stimula economia.

 E mandatario Angel ta bisa cu semper e ta dispuesto pa scucha nan recomendacion. Sinembargo e tin cu bisa cu den cuadro di gobierno su compromiso di  cumpli cu reglanan financiero, awor no tin espacio pa baha impuesto.

Minister Bermudez  ta bisa cu e por imagina cu comercio ta experiencia cu e totalidad di nan gastonan di operacion por ta halto pa nan.  Den esey, e tin cu bisa cu durante su prome combersacion cu  Atia y KvK, el a pidi e gremionan aki pa elabora cierto recomendacion riba “unda cu mi por yuda nan reduci e gasto ey.” E mandatario ta lamenta cu te dia di awe e no a haya nada for di nan.

Bermudez a declara na Bon Dia Aruba cu como minister, e ta un facilitado, y esaki ta loke el a yega di bisa tanto na KvK como na Atia. E ta reitera cu si tin caminda cu e por simplifica of modernisa cierto reglanan of leynan cu lo por yuda pa baha e costo di nan inversion, “gustosamente mi ta hacie”.

Reduccion di impuesto
Pero tambe e tabata masha cla di bisa cu den e temporada aki cu ainda gobierno tin cu cumpli cu obligacionnan di parti di finansa publico, no tin espacio pa baha belasting.  E tin cu remarca cu den su rapport preliminar Fondo Monetario Internacional (IMF) a duna su recomendacion encuanto e fondo di nos seguro medico general (AZV).

“No tin espacio pa baha e primanan di AZV, fuera cu tin otro desaroyonan cu a tumando luga y cu lo bay tuma luga cu ta e vergrijzing cu mas ta drentando di nos comunidad y tambe di nos mercado laboral.” Sr. Bermudez ta indica cu mester tene cuenta cu e grupo cu mas ta exigi cuido medico ta creciendo.

P’esey su mensahe na e gremionan comercial ta: “Bin cu cierto ideanan. Bin cu cierto recomendacionnan cu nos por papia; y si tin caminda cu por yuda, mi lo yuda”. Pero cu e mesun rosea e tabata categorico di bisa cu e no por priminti baha impuesto, ya cu esey no “ta na mi alcance na e momento aki bou e circunstancia aki”.

Espacio si tin ora refineria ta ‘huma’
Sinembargo e minister ta kere cu si den futuro cortico e refineria “ta huma”, y berdaderamente gobierno ta haya entrada adicional for di actividad aki cu por duna nos pais un crecemento positivo den nos GDP (entrada nacional), y si e ta structural y cu ta funcionando debidamente, nan lo por evalua cierto posibilidad. Kiermen gobierno lo por mira kico ta e  beneficionan ey, y asina gobierno lo por  aloca comercio pa ehempel riba drecha e peso di primanan of tarifanan cu comercio ta confronta. Pero actualmente reduci esaki si no ta na nan alcance, e minister Bermudez ta enfatisa.

Bon Dia Aruba kier remarca cu KvK a traha diferente rapport pa baha gastonan pa haci negoshi y/of pa kita burocracia cu ta stroba desaroyo economico. E rapportnan aki a bay cu hopi recomendacionnan direccion gobierno.