Dies funcionario di gobierno di ex-presidente di Uruguay José Mujica a ser denuncia pa oposicion di Uruguay, pa un supuesto participacion den negoshi na Venezuela.
E denuncia ta riba hende cu tabata den posicion halto den e periodo di 2010 pa 2015. Pa tal motibo nan ta solicita un investigacion riba e empresa conoci como Aire Fresco, como e unico empresa cu por traha como intermediario pa negoshi cu Venezuela.
Diputado Jaime Trobo a bisa cu e demanda ta busca di sa e procedimento, caminda nan a contrata empresa Aire Fresco. Esey no a keda cla nunca, pasobra nunca a logra na sa e manera con e empresa Aire Fresco a keda como e unico negociador y intermediario
Nan ta pensa cu e empresa aki a cobra comision pa asina participa den negociacion y a ser denuncia dilanti husticia pa crimen organisa.
Segun e grupo di oposicion, Aire Fresco tabata cobra comision di como 2% di cada negoshi di alimento cu nan a cera cu Venezuela. Partido politico Frente Amplio a nenga e acusacion aki.
Asina e denuncia di negoshi aki cu Venezuela ta un mas entre otro denuncia relaciona cu e maneho di Fondes (Fondo para el Desarrollo) di Uruguay. Investigacion ta tuma lugar riba empresanan cu a haya financiamento pa Fondes, manera empresa Alas Uruguay cu a keda cu un perdida di 15 miyon dollar y Pressur, cu a haya 6 miyon dollar tambe.
