Despues di e avalancha na Mocoa, e damnificado y victimanan ta haci nan mes hopi pregunta. Y un di nan ta si nan por entabla un demanda colectivo contra estado.
E falta di prevencion di parti di entidadnan oficial pa cu e riunan cu ta pasa a traves di e municipio, specialmente e quebrada Taruca, ta un di e argumentonan pa cualifica esaki como un tragedia anuncia. Den e albergue di e coliseo Olimpico, lidernan di e barionan San Miguel, San Fernando y Los Bosques, afecta pa e avalancha, a reuni pa defini accion.
Pa Edwin Arbey Jansasoy, e idea di un accion legal ta un opcion cu por sirbi pa evita tragedia nobo, pero e ta señala cu ainda nan no tin asesoria huridico. “Awor nan ta bisa cu nos mester bay di e alberguenan pa otro ciudad y cu e Oficina di Gestion di Riesgo ta responde pa nos, pero esey lo significa atrobe bay otro luga y nos sa cu si nan saca nos di aki, hasta e tiki placa cu nan a priminti nos por bay perdi”, el a comenta.
Y e ta señala cu e comunidadnan ta uni, pero tin miedo di halsa nan bos pa e problemanan di orden publico cu ta caracterisa e region. “Nos sa cu den e pais aki e lidernan ta silencia nos, pesey nos no sa kico pa haci, si ta denuncia y despues tin un man yen di tera den bo boca, of spera ki cos nobo por bay pasa,” el a agrega.
Aura Edia García, di 67 aña, ta bisa cu e lo apoya e demanda. “Nos mester husticia y cu nan duna nos conseho pa por haci algo pronto”. Gilberto Gutiérrez, otro lider, ta afirma: “Ningun hende a kere cu lo tabata posible (e avalancha) te cu awe por mira e consecuencianan, awor nos mester ta uni pa demanda.”
E situacion di Edwin, Aura, Gilberto y e damnificadonan Gustavo Prada, presidente di e Corporacion Casa Armerita ta comprende perfectamente. “Ta duel nos loke a pasa na Putumayo. Nos ta pensa cu aportando e 25.000 mortonan di Armero lo tabata suficiente pa haci e sistemanan di prevencion funciona”, el a sigura.
Segun Ricardo Hoyos, ex-presidente di e Conseho di Estado, e exito di un demanda ta depende di varios factor. Na prome luga, e ta bisa, mester proba cu a causa daño, manera perdida di bienes y di bida. Despues, cu tabatin fayo den servicio (di accion o di omision, atribuible na un entidad publico). Y, ademas, cu no a realisa e trabaonan di prevencion. Cu o sin demanda colectivo, e proceso di rehabilitacion ta mustra di bay exigi varios aña.
