E relato financiero 2016 di AZV ta publico. E seguro nacional ta bisa cu e gastonan di cuido a subi cu 5,2% cual nan ta categorisa como algo ‘excepcional’. Pasobra nan meta ta pa e gastonan keda riba nivel of hasta baha.
E causa primordial di e aumento di gastonan di cuido ta ‘un calculacion demasiado abou di e obligacionnan cu mester a cumpli cu ne pa loke ta cuido medico den exterior’, asina AZV ta bisa. E seguro ta bisa tambe cu nan a tuma pasonan pa ‘evita e riesgo aki den e siguiente añanan’.
AZV a premira pa 2016 cu lo a gasta algo mas cu 37 miyon florin na cuido medico den exterior. Sinembargo e suma a yega te na 62 miyon florin, un aumento di 66%. Cuido den exterior ta costoso segun e seguro pa motibo cu e tratamentonan en general ta tuma mas tempo y asina lo costa mas.
A pesar di e crecemento fuerte y inespera den 2016, e crecemento promedio di e gastonan den e ultimo cinco añanan ta keda modera: e periodo 2012-2016 ta conoce un crecemento anual promedio di rond di 2,7%. Den e mesun periodo e inflacion anual tabata un promedio di -0,5% y e crecemento anual promedio di e poblacion tabata 1,6%, segun AZV.
Pa e siguiente añanan te 2020 AZV ta tene cuenta cu un aumento promedio di alrededor 4%. E aumento den e crecemento anual aki compara cu e periodonan anterior tin su causa den e desaroyo di iniciativanan nobo manera e renobacion y construccion di hospital, e introduccion di cardiologia intervencionista, e ampliacion di capacidad di operacion den Imsan y e introduccion di radioterapia den Imsan.
Menos entrada
E cifranan den e relato tambe ta mustra cu tin un crecemento leve di e entradanan di AZV di 1,6%. Pero esaki ta mas abou cu nan a premira. E entrada di prima a keda atras cu 2 miyon florin (total casi 238 miyon florin). E entrada di e impuesto BAZV tambe a trece 6,5 miyon florin menos den e caha (total di casi 118 miyon florin).
Contribucion gobierno
E parti di e contribucion di gobierno den e financiamento di AZV den aña 2016 un biaha mas a baha. Den e periodo desde di introduccion di AZV e parti di e contribucion den e financiamento a baha alrededor di 60% den 2001 pa 13% den 2016. E bahada aki a bay man den man c e aumento di prima y tambe introduccion di e impuesto BAZV. Den caso cu e entrada di prima y BAZV keda igual, segun AZV, ‘e expectativa ta cu e parti di e contribucion di Pais Aruba lo bolbe subi den e siguiente añanan’. E aumento lo ta di casi 55 miyon pa 97 miyon florin.
E relato 2016 por haya riba www.az.aw.
