Recientemente Camara di Comercio di Aruba (KVK) a inicia un encuesta pa e debate politico cu nan ta organisando. KVK a pone un ‘poll’ online pero esaki tabata dunando resultadonan cu no ta cuadra cu e realidad.
Danki na ciudadano Francisco Figaroa kende tabata alerto pa e fayo technico di e encuesta aki, Bon Dia Aruba por a verifica pa su mes cu di berdad e resultado no ta cuadra. Ta asina cu bo por vota mas cu un biaha pa e mes un partido cu un poco conocemento di computer.
Fayo
E locual cu ta trece e fayo en realidad ta cu e encuesta ta bisa cu bo por vota un biaha so pero despues di ‘clear’ bo historia di browser, bo por vota atrobe. Nos redaccion a haci un test caminda a automatisa e proceso di votacion y asina a logra di vota casi 300 biaha den 15 minuut pa partido PPA.*
A tuma contacto cu KVK pero no a logra ainda pa combersa cu nan riba e fayo aki. Mientras tanto a tuma nota si cu e encuesta no ta activo na e momento aki riba website di KVK.
*NOTA: Bon Dia Aruba no tin ningun tipo di afiliacion na niun partido politico. E test cu a wordo haci tabata cu proposito di ilustra e fayo.
