Un avion di e linea Peruvian Airlines di number OB2036P, bao mando di Denis Kahn Murillo di 59 aña a sali for di pista. E avion a explota y kima na aeropuerto Francisco Carle di Jauja. E accidente aereo a sucede diamars despues cu e avion tabata yega na Lima for di Jauja cu 141 pasahero y 9 tripulante.

Testigo a bisa cu na momento cu nan a toca tera e parti dilanti di e avion a sufri varios golpi contra e pista. Esey a provoca cu e wiel banda drechi a sali for di pista. E e tren di aterisahe (landing gear) a perde e controly a keda lastra riba tera te un distancia di mil meter, e hala banda drechi a cay riba un rooi y a destrui e waya di separacion di e tereno.

Tur pasahero a bay den panico, pasobra nan a mira candela y sentimento di desesperacion a podera di nan tur. E avion a keda para na 20 meter pafo di e pista danki na e tereno muha. Tripulantenan a activa e plan di emergencia y a saca tur pasahero for di e avion prome cu e aeronave lo a explota.

“E avion a gana mi, e pista di aterisahe no tin ningun relacion cu e accidente, aparentemente tabata un fayo tecnico, prome cu mi a pisa tera tur cos tabata bay normal. Tur pasahero a keda sano y salvo pasobra nan a sali rapidamente for di e avion, mientras cu nan a laga tur nan pertenencia den avion. Mi a purba di tene riba e pista pero e avion a perde ekilibrio y a gana mi”, Denis Kahn a splica.

E pasaheronan masculino a bira rescatista, nan a saca tur mucha y hende grandi cu tabata den e avion. Despues di 10 minuut anto e avion a cuminsa kima, e candela a envolve henter e avion y finalmente el a kima completo. Riba e pista a keda parti di motor, parti di avion y e wielnan.

Na momento cu bombero y polis a haya sa di e situacion nan a mobilisa ambulancia tambe pa duna atencion na 30 tripulante lesiona cu a ser hiba pa hospital Domingo Olavegoya. Despues di un ora bombero a paga e candela. Mas di 60% di e avion a keda totalmente kima.

Abilia Arias di 70 aña a bisa cu el a sinti con e avion a dal riba e pista y a bons 4 biaha. Na e momento ey tur tas y cos a cuminsa cay riba e pasaheronan y grito a cuminsa den e avion. “Mi no a logra habri mi faha di seguridad pero mi a haya forsa pa sali pafo pasobra mi tabata kier keda bibo. Mi a sali via bentana di atras, un auxiliar di vuelo a pusha mi”.