Un crimen a conmove poblacion na Venezuela, cu ta nenga di custumbra na biba den situacion di horor. Un suceso cu ta poco comun y cu a sorprende tambe nan victima, dos sargento di Guardia Nacional Bolivariano cu a sali diasabra pa bebe par di trago na un bar na Sabana Grande, Caracas. Sabana Grande ta un punto importante den un recorido di fiesta na Caracas.
Despues di 3 or di marduga, sargento primero Yohan Borrero di 25 aña y sargento Andres Ortiz di 23 tabata huma un cigaria pafo di e local. Un grupo di mucha a bin for di sombra y a bay cu e tas di un di nan. E militarnan a cuminsa un persecucion tras di e muchanan, pero na otro caminda a topa cu otro grupo di mucha cu tabata arma cu cuchiu. Nan a baha riba e militarnan manera piraña cu kier come un tiki di carni. Borrero a cay despues di haya nuebe puñalada, un di nan mortal riba su cueyo. Ortiz a ser hiba pa hospital, cu herida na su pecho y abdomen. Ningun di nan a sobrevivi.
E prome mucha deteni tabata un mucha homber di 10 aña y un mucha muhe di 15 aña. Mas laat a detene otro menor di entre 6 y 8 aña. Polis a core tras di 12 mucha cu a participa den asalto y cu ta pertenece na e banda Los Cachorros. Ley organico pa proteccion di mucha y adolescente di Venezuela ta bisa cu mucha menor di 14 aña no por haya castigo na Venezuela, sino un medida di proteccion so. Si e mucha ta mayor di 14 aña, manera e prome mucha cu a keda deteni, anto e castigo maximo por ta 10 aña.
Caracas ta e ciudad mas violento di mundo, unda homicidio ta parti di bida normal (ta asesina un Venezolano cada 18 minuut). Den ultimo dianan dos studiante muhe y un homber di aviacion Bolivariano a keda secuestra, tortura y asesina. Un pareha cu tabata bao algun efecto nocivo a mata nan yiu di 14 luna. Dos homber mas a muri ora cu a horta nan brommer. Moises Blanco a haya un golpea pasobra e tabata burachi y a purba di bay den un auto robes. Den 80 dia cu a pasa na 2017, tin 31 polis cu a keda asesina na Caracas.
E crimen na Sabana Grande ta mustra otro consecuencia cu Venezuela ta sufri: mucha riba caya. “E caso aki ta mustra un problema social cu Venezuela ta bibando. E crisis economico a bay profundo y a hiba hopi hende na situacion di choller riba caya. E muchanan cu a asesina dos militar ta algun parti di hopi pandiya di mucha y adolescente cu tin na Caracas y resto di pais. Muchanan ta uni pa sinti mas sigur y asina tin mas poder” Luis izquiel, criminologo a bisa.
E cantidad di mucha riba caya a aumenta den ultimo tempo, multiplicando e cantidad di 10.000 cu UNICEF a conta na aña 2010.
