Sindicato FTA a gana e referendum di e trahadonan di Orchid Casino den hotel Riu Antillas cu a tuma luga na MFA Noord, ayera tardi.
Despues di e contamento di voto cu a sosode den presencia di representante di e casino y tambe di e sindicato, Mediador di Gobierno Anselmo Pontilius a declara na Bon Dia Aruba cu FTA a logra e mayoria exigi pa representa sindicalmente e trahadonan di Orchid Casino.
Di acuerdo cu e lista un cantidad di 74 trahado di e casino menciona por a haci uzo di nan derecho di voto. Di nan 44 a bay vota y tur a vota pa sindicato FTA. E ley di referendum ta indica cu e mayoria ta wordo determina pa un 50% plus 1 di e trahadonan cu tin derecho di voto. Den e caso aki e mayoria tabata ta 38 voto y FTA a logra 44 voto.
Sr. Pontilius ta haya cu e resultado aki ta un ratificacion di e resultado di e referendum cu a yega tuma luga den pasado. Aworaki tanto gerencia di e casino como dirigente di FTA mester percura pa sinta na mesa, y asina resolve loke nan tin cu resolve y negosha un contracto colectivo (CAO). Presidente di FTA, Hubert Dirksz a expresa cu como sindicato nan ta contento cu e resultado di e referendum.
E ta haya cu e parti di discusion cu tabatin prome di e referendum ta tras di lomba. Ta keda awor pa nan sinta na mesa pa atende cu e necesidadnan di e trahado y atende loke nan mester atende via un CAO. Joselyn Geerman di recurso humano di e casino a bisa cu ainda ta prematuro pa bisa hopi cos. Pero si e ta haya cu e decision a wordo tuma di parti di e trahado y e proceso di referendum tabata fair haci, y awor nan lo wak kico ta bin despues.
