Como e pilar economico di Aruba, turismo ta un punto importante pa Gabinete AVP-FUTURO. Den nan programa di gobernacion nan ta elabora riba e implementacion di un modelo turistico nobo duradero cu ta ofrece experiencia di calidad na e bishitante, cu ta produci rindimento financiero y social pa e hendenan y cu ta conserva locual cu ta di balor pa e ciudadano.

E modelo turistico cu Gabinete AVP-FUTURO a desaroya ta percura pa stabilidad economico, prosperidad y oportunidad pa comunidad y comercio. E conflicto di e modelo turistico ta cu e industria cu ta contribui na tanto crecemento economico, ta crea retonan grandi pa su propio sostenibilidad. E impacto di e efectonan negativo di e crecemento excesivo di turismo, specificamente e uso di areanan natural limita, a crea sentimentonan mixto den comunidad y turistanan.

No obstante e crecemento economico basa riba turismo y e nivel eleva di bishitante turistico cu ta kibra record, gobierno ta remarca cu comunidad no ta sinti cu e rindimento ta den proporcion cu e impacto negativo riba infrastructura, mercado di vivienda, mercado laboral, medio ambiente/naturalesa, ecologia y espacio publico cu ta na disponibilidad di actividad turistico.

Cu nan entrada gobierno nobo tin oportunidad nobo pa duna contenido na un maneho turistico mas holistico cu ta cuadra cu expectativa di comunidad, manteniendo e nivel di producto Aruba pa e bishitante. Gabinete AVP-FUTURO ta enfatisa cu comunidad no ta acepta e maneho actual di turismo y pa e motibo aki mester ahusta y mehora e modelo turistico pa realisa nan meta.

E meta aki ta pa introduci un modelo turistico duradero cu ta ofrece experiencia di calidad na e bishitante, cu ta produci rindimento financiero y social pa e hendenan y cu ta conserva locual cu ta di balor pa e ciudadano.

Aruba a surpasa su capacidad di carga pa acumula mas hotel. Gabinete AVP-FUTURO ta remarca cu e maneho di presente y futuro mester enfoca riba mas rindimento cu menos presion y consecuencia pa naturalesa, infrastructura fisico, mercado laboral y mercado di vivienda.

Pa garantisa esaki gobierno lo frena e construccion di mas camber di hotel y condominio y lo diseña un maneho nobo pa desaroyo di boutique hotels cu un cantidad di camber limita dirigi riba inversionista local.

Gobierno lo implementa e strategia di mercadeo pa atrae bishitante cu un capacidad di gasto mas halto y diversifica e experiencia cu ta ser ofreci ta elemental den e vision turistico di e gabinete.

Ademas gobierno lo enfoca riba actividadnan specialisa (“niche”) manera cultura, experiencia culinario, arte, medicina, deporte, ecologia, MICE-Lucrativo, y duna e barionan mas protagonismo.

Pa Gobierno nobo ta importante pa e recursonan natural ta proteha, manera beach. Pa combati e presion cu tin riba e beachnan y otro areanan natural hopi bishita, Gabinete AVP-FUTURO lo introduci un maneho nobo y innovativo den Caribe, pa limita concentracion den areanan hopi bishita y move e concentracion pa otro experiencia turistico manera Mountain Bike Trails, Oranjestad y San Nicolas.

E gobierno nobo ta indica cu e modelo turistico mester tin un rindimento pa comunidad. Pa esaki gobierno mester ahusta e modelo cu ta midi exito y progreso economico. No ta determinante e modelo turisticamente convencional manera cantidad di stay-over visitors of cruise visitors, pero lo usa un standard diferente.

Loke lo ta determinante pa midi exito lo ta con rindimento ta refleha den miho condicionnan laboral, un reparticion mas husto di e beneficio economico, oportunidadnan pa SME’s (manera agricultor cu ta produci pa sector hotelero, musica y arte di talento local pa entretene e bishitantenan) y inversion den conservacion di naturalesa, ecologia, biodiversidad y sostenibilidad.

Gabinete AVP-FUTURO ta enfatisa cu e beneficio economico mester ta na beneficio di comunidad y comercio local. Gobierno lo ta pro activo hunto cu stakeholder den realisa e “trickledown-effect” di e beneficio economico di e industria.

Pa realisa e modelo turistico nobo gobierno mester organisa dialogo strategico cu e meta pa crea sosten y motivacion pa ahusta/transforma/reforma e modelo turistico na e deseo di comunidad. Percura cu e esfuerso efectua pa garantia cu turismo ta utilisa pa corigi desigualdad social den comunidad y eleva experiencia di bida di e hendenan.

Gobierno lo garantisa e confiansa y satisfaccion di comunidad pa cu e “driver” di Aruba su economia. E sentimento cu comunidad ta perde mas cu e ta gana mester transforma den un sentimento cu turismo tin un balor agrega pa un y tur. Gobierno mester garantia cu tin mas participacion di comunidad den planificacion y maneho di turismo.

E fenomeno di vacation rentals mundialmente a crece desproporcionalmente. E impacto ta causando preocupacion den comunidad mirando cu inversionista di exterior ta cumpra cas riba mercado di vivienda cu meta pa capitalisa riba nan den forma di vacation rental causando cu prijs di vivienda ta aumenta y tin scarsedad di vivienda accesibel riba e mercado.

Pa gobierno implementacion di un maneho di regulacion di vacation rentals ta necesario y urgente, pa combati e efectonan negativo. Nan lo percura pa registracion obligatorio pa yuda e cumplimento fiscal di e sector di vacation rentals y lo sigui e trayecto di introduci norma y autoridad pa vigila e calidad di e sector.

Gabinete AVP-FUTURO ta enfatisa cu su enfoke ta reduci e presion y impacto negativo riba infrastructura, naturalesa y structura social ta enfoca riba bishitante turistico cu interes pa un experiencia diferente y cu mas capacidad financiero pa inverti den economia local.

Gobierno ta remarca cu mester reforma e oferta di educacion profesional y conecta esaki mas na e demanda di e sector amplio di turismo. Nan lo evalua e posibilidad pa institui un trayecto di formacion y capacitacion den un forma di Hotel Vakschool pa prepara e hendenan pa brinda servicio di excelencia na e bishitante y reduci necesidad di trahado di exterior.

Esaki lo sucede den cooperacion cu e stakeholders den mundo turistico y lo stimula nan pa inverti den aspecto vocacional y educacional di scolnan pa e trabou necesario den sector turistico.

Den cuadro di diversificacion di e economia, Gabinete AVP-FUTURO ta mira un potencial enorme den exportacion di conocemento. Aruba su experiencia, conocemento y capacidad riba tereno di hospitalidad y turismo por habri porta pa entrada nobo economia. Exportacion di conocemento di organisacion, mercadeo y structura di turismo pa area unda turismo no ta desaroya of ta den desaroyo por crea un actividad economico diversifica cu ta genera alivio pa Aruba.

Gobierno lo crea un aliansa strategico cu Aruba Tourism Authority (ATA) y e industria hotelero pa trece turista cu un frecuencia regular pa siman na San Nicolas.