Recientemente den un entrevista cu atleta di bodybulding, Mervine Kock, el a trece dilanti un mensahe special pa adultonan di 60+ tocante importancia pa mantene un estilo di bida saludabel, specialmente den edad avansa.

Mervine a splica cu un di e metanan ta pa educa adultonan riba 60 aña cu ta importante pa train, un di e factornan cu ta yuda e persona sinti mas jong y keda cu mas mobilidad. “Esey ta e meta principal. Pa bo ta movibel. Pa ora bo tin 70 aña bo por cana of subi un trapi, bo por drumi bon, sinta sin wanta of ayudo,” el a remarca.

Mervine tin hopi aña den mundo di bodybuilding y cu su 68 aña di edad, e ta train seis biaha pa siman den gym, dos pa tres ora. El a enfatisa cu esaki absolutamente no mester ta e caso pa demas adulto.

El a conseha cu por cuminsa cu training na gym dos biaha pa siman. Cambia e estilo di come pa yuda e musculonan, pasobra nan ta e prome defensa, nan ta carga e curpa.

“Mi ta kere cu instancianan mester cuminsa enfoca riba laga hendenan grandi haci mas ehercicio, pa nos tin un poblacion cu ta bira grandi di forma saludabel, cu nan no mester di tanto pildo y medicamento. Nos tur ta bira grandi, nos tur ta bira bieu, pero e manera cu bo kier bira bieu ta un escogencia. Bo kier bira bieu saludabel, bo kier bira bieu movibel, por, pero e ta keda na bo como ser humano kico bo ta scoge p’e y na Aruba nos mester educa hende y vooral hende muhe,” el a subraya.

Basa riba su experiencia, prome cos e ta recomenda adultonan mayor cu kier cuminsa train ta busca un hende cu ta train hende di edad halto. El a splica cu awendia tin hopi instructor, pero ta importante pa busca un hende cu sa con pa guia e persona di edad avansa, siña nan kico nan por y kico nan no por haci mas, pasobra tin cierto cosnan cu no ta posibel mas na cierto edad.

El a agrega cu ta hopi importante tambe pa cambia e estilo di bida. El a indica cu despues di cierto edad mester stop di come sucu, hariña y stop di bebe alcohol. Cuminsa cana, haci ehercicio of bay gym dos biaha pa siman.

“Cuminsa haci training di forsa pa tin longevidad cu ta hopi importante pa asina wanta e masa muscular pa bo por keda move hopi y mas rapido. Esey ta e cos cu hopi hende no ta compronde. Mas bieu bo bira, bo ta perde masa muscular cual ta hopi peligroso,” el a splica.

Otro aspecto cu Mervine a subraya ta e nivel di testosterona den hende muhe, specialmente hende muhe di edad avansa. El a splica cu segun e hende muhe bira grandi e nivel di testosterona ta baha, y ora e hende muhe pasa door di menopausa e ta baha y bira casi nada, locual por acelera e proceso di embehecimento pasobra tin perdida di masa muscular.

El a señala cu cada aña un hende muhe ta perde 2% pa 3% di su masa muscular si e no haci training di forsa. Pa e motibo ey, el a enfatisa e importancia pa hendenan muhe ta activo y mantene nan mes saludabel.

Den su caso, el a splica, e ta usando testosterona door di bebe cierto suplemento cu por wanta e testosterona riba un nivel. Pero tin cierto suplemento cu mientras edad keda avansa, nan efecto ta bira menos. E ora ey mester pasa riba otro suplemento cu si ta yuda cu e nivel di tesotosterona den edad avansa, y tambe tin terapia pa wanta e testosterona riba un nivel.

“Mi ta haya jammer cu na Aruba no tin niun dokter specialisa riba e tereno aki con pa yuda. Den e deporte di bodybulding tambe mester guia profesional con pa usa cierto suplemento y pa perform miho, sobre todo pa hende muhe. Nos hende muhe tin pensamento cu asina nos yega 40/45 aña nos ta bieu, pero e pensamento ey mester cambia na Aruba,” el a enfatisa.

El a subraya cu na Aruba nada ta ser haci tocante esey y ta comun den comunidad pa pensa cu hendenan di edad mester di cuido of mester bay den cas di cuido of mester aparato pa yuda cana. “E cosnan ey no mester, si tin bon educacion lo tin un generacion di hende cu ta bira grandi di un manera saludabel,” el a agrega.

Tur esaki a hib’e na un idea pa un proyecto na unda den cada bario gobierno ta subsidia un gym y adultonan grandi nan ta bay gym pa un suma hopi abou. Ademas di esaki ta inclui suplemento pa nan, cuater biaha pa aña, di un bon proteina, colageno y vitamina B compleho.

Con por yega na e placa ey? El a splica cu por introduci “sugar tax” of impuesto riba alcohol. “Na Aruba hopi hende ta bebe hopi y come hopi cos dushi y e placa aki ta bay pa e proyecto pa adultonan grandi saludabel. Y asina tambe e generacion aki ta bay gasta menos placa di AZV,” el a indica.

Otro persona cu tambe ta envolvi den e mundo di bodybuilding Giovanni Arendsz, ta propietario di un gym pa 27 aña y tin mas di 45 aña ta train. El a remarca cu e semper a bisa cu edad ta djis un number y hustamente na momento cu edad ta subi ta importante pa train y haci ehercicio.

“E beneficionan ta cu bo ta mira menos malo, bo defensa ta bira grandi, menos gasto pa AZV. E ta bira un estilo di bida, bo ta siña come bon, drumi na tempo y train constantemente,” el a enfatisa.

Di su banda su conseho, na tur e adultonan grandi cu tin miedo of ta intimida pa train den gym, ta pa simplemente yega gym y no tene miedo. El a splica cu adultonan mayor no mester spanta ora nan bay gym y wak esnan cu ta train cu musculo grandi y pensa cu nan mester train pa bira asina.

“Pa yega na e nivel ey ta tuma hopi aña di training y un estilo di bida full diferente. Pero pa bo salud sigur cu si train, y e dolornan cu bo por tin awor ta bay mira menos y tur cos lo ta danki na gym y na un dieet y estilo di bida saludabel,” el a subraya.