(AP) – Tin un miembro nobo den e famia di Starbucks: Un tienda traha cu 3D printer na Merca.
E gigante den coffee basa na Seattle cu mas di 17,000 sucursal den henter mundo nunca antes a yega di tin un tienda manera esun cu lo habri e siman aki na e Brownsville, Texas, cerca di e frontera entre Merca y Mexico, unda un brasa robotico controla pa un computer ta haci mayoria di e trabao.
E localidad – cual ta drive-thru so – ta den plan pa habri diabierna y ta haci Starbucks un di e nacion su poco companianan grandi cu a haci uso di 3D printing pa construccion comercial. Constructornan mas tanto a usa e tecnologia den construccion residencial mientras nan ta pone nan bista riba innovacion pa combati un crisis di vivienda.
Starbucks no ta bisando si mas tienda manera esaki ta den horizonte ni dicon e compania a scoge Brownsville, cual tin alrededor di 190,000 residente y por lo menos 4 otro sucursal nobo den e area. Na simple bista, e edificio compacto cu e logo di Starbucks ta parce cualkier otro, pero ora cu bo acerca bo ta mira e textura cu ta parce tubonan poni riba otro.
Expertonan di construccion ta bisa cu e tienda aki ta un ehemplo di un industria cu ta buscando manera di usa e tecnologia.
“E ta den su comienso ainda,” James Rose , director di Institute for Smart Structures na University of Tennessee a bisa. “Mi ta contento di mira hende ta haci yen cos diferente cune, y mi ta kere cu lo yega un punto unda nos lo saca afo cua ta su miho uso. Pero awo mi ta kere bo lo mira hopi experimentacion, y mi ta kere cu esey ta algo bon.”
E tienda ta na un caminda drunk unda Faviola Maldonado ta entre esnan cu a mira e construccion ta tuma forma poco poco. “E ta diferente,” Maldonado a conta, ken ta opera un tienda di joyas banda di dje. “E ta tecnologia di nivel sumamente halto.”
Starbucks a confirma cu esaki ta e prome tienda traha cu 3D printer na Merca pero a nenga un peticion pa entrevista.
Andrew McCoy, director asociado di investigacion y innovacion na Myers-Lawson School of Construction na Virginia Tech, a yama e tienda “un lider.”
En general, construccion usando tecnologia 3D toch ta costa mas cu construccion tradicional, segun McCoy. Pero, segun el a agrega, esaki ta yuda atende un escasez di labor y por ta un manera pa construi algo mas lihe. E ta anticipa cu eventualmente su costo lo ta mas competitivo/
“Nos ta mirando e tecnologia bira mas lihe y mas chikito,” McCoy a splica. “E ta birando mas facil pa usa.”
