Ayera, un delegacion di Eerste y Tweede Kamer di Hulanda a haci un bishita na Conseho di Minister di Aruba. Minister Gerlien Croes (Futuro) a comparti imagennan di e encuentro riba rednan social cu un mensahe cortico, bisando: “Awe hunto cu Prome Minister mr. Mike Eman nos a reuni cu Jan Anthonie Bruijn, presidente di Eerste Kamer & Martin Bosma, presidente di Tweede Kamer.”
No tabatin mucho informacion tocante e bishita. Segun portal online, NoticiaCla, e delegacion a yega Aruba “pa actualisa nan mes riba e situacion di Aruba y conoce e gobernantenan nobo.”
Mientras tanto, Aruba ta programa pa ricibi mas bishita di mandatarionan Hulandes.
Proximo diadomingo, 4 di mei, miembronan di Comision di Relacionnan di Reino di Tweede Kamer ta yega Aruba pa un bishita di trabao, pa haci un introduccion inicial cu nos isla.
E delegacion ta consisti di Olger van Dijk (NSC), Raoul White (GroenLinks/PvdA), Aukje de Vries (VVD), Faith Bruyning (NSC), Mpanzu Bamenga (D66) y Don Ceder (Christen Uni). Nan programa di bishita ta inclui encuentronan cu hubentud, y actividadnan relaciona cu desaroyo economico, seguridad y agricultura, como tambe sostenibilidad.
Ademas, prome minister Dick Schoof ta programa pa yega Aruba dia 10 di mei proximo, y ta spera di reuni cu Gobernador di Aruba, prome minister y parlamentarionan. Ademas, e lo bishita empresa local, hospital, y KIA, durante su bishita cortico di un solo dia.
