(AP) – Mientras Vaticano ta cuminsa cambia rumbo di despedida di Papa Francisco la eleccion di su sucesor, e status di un cardinal Italiano antes poderoso y si e por vota den e conclave di dia 7 di mei ta den duda constante y un fuente di rumor.
Cardinal Angelo Becciu antes tabata un hefe di empleado den Vaticano cu hopi influencia, y tabata un candidato pa bira Papa. Sinembargo den 2020 tur esaki a cay ora cu Papa Francisco a obliga su persona retira for di su cargo y su derechonan como cardinal pa motibo cu tabatin acusacion di mal conducta financiero den su contra.
Becciu a nenga comete cualkier eror sinembargo el a ser hiba huicio den corte criminal di Vaticano y condena pa cargonan relaciona cu finanzas den december di 2023. E ta den proceso di apela e condena y sentencia den prison di 5 aña y mey mara na esaki y a participa den reunionnan prome cu e conclave, sinembargo tin un pregunta sin contesta tocante su habilidad di por vota den e conclave.
Riba dialuna, e cardinalnan drenta e dialogo prome cu e conclave a keda inunda cu pregunta di reporteronan tocante Becciu y si e lo ser permiti drenta Kapel Sistine of no. No a tuma ningun decision, pero media Italiano a reporta dialuna atardi cu Becciu a bisa e demas cardinalnan cu e lo retira su participacion.
Becciu a haya prominencia y poder bao papa conservativo Papa Benedicto XVI y ta hopi afilia cu e guardia bieu di Vaticano conservativo. Ora cu inicialmente el a bira un consehero cercano di Papa Francisco, Becciu su caida consecuente na man di Francisco por sugeri cu el o vota pa un persona cu ta probable di bolbe cambia algun di Francisco su reformanan.
Cu 76 aña, Becciu ta bao e limite di edad di 80 y tecnicamente ta eligible pa vota, sinembargo e estadisticanan oficial di e Vaticano ta nombra su persona como un cu no por vota. Ora cu a revela e cargonan den su contra den 2020, Becciu a declara na un conferencia di prensa cu e no lo vota den ningun conclave den futuro. Pero recientemente el a insisti cu e tin derecho di vota y abogadonan ta cobando den e documentonan den vaticano cu ta regula e conclave pa determina si e tin rason.
E documento, conoci pa su nomber den Latin Universi Dominici Gregis, ta detaya e criterio pa e votadornan, cual ta laga cla cu tur cardinal bao di 80 aña tin e derecho di elegi e papa, cu excepcion di esnan cu a keda “libera di nan cargo of cu tin e consentimento di pontifice Romano cu a renuncia nan posicion di cardinal.” E ta agrega cu despues di e fayecimento di un papa, e “Colegio di Cardinal no por bolbe acepta or rehabilita nan.”
Nunca a yega di tin claridad riba kico exactamente Becciu a renuncia ni con: E declaracion di poco palabra cu e Vaticano su oficina di prensa a publica dia 24 di september den 2020 a bisa cu Francsico a acepta Becciu su renuncia como prefecto di Congregacion pa Causa di e Santonan (Congregation for the Causes of Saints) “y su derechonan como cardinal.”
No tin indicacion cu el a ricibi sancion.
