Nos asuntonan cu ta concerni Hulanda tambe, ta sigui duna problema. Aki tin dos asunto separa: e ley di supervision financiero cu no a keda cla, y e nombramento di e ultimo ministro cu falta den e gabinete nobo. Den ambos caso nos ta keda mira cu aparentemente politico(nan) tin un interes di propaga e asuntonan aki sin conta henter e berdad.

Den e caso di e ley di Reino pa supervision financiero nos ta yegando na fin di april sin un propuesta entrega na Staten di Aruba, mucho menos uno entrega na Tweede Kamer pa 1 di mei proximo. Como si ta trata algo masha ‘normal’, ta anuncia cu secretario di estado Hulandes a dicidi cu no ta warda mas y ta impone e medida di aumenta e interes cu Aruba mester paga, di 5,1% te na 6,9%. Pregunta cu nos no ta mira ningun caminda: Hulanda ta impone un sancion riba gobierno di Aruba, si e responsabilidad pa no tin un propuesta na Tweede Kamer na tempo, ta di ambos gobierno? No, pero nos no a tende grito di protesta di gobierno di Aruba, anto nos mester supone cu e responsabilidad pa e tardanza ta na banda di Aruba.

Seguidamente e pregunta: ken na Aruba ta culpable anto, e gabinete actual o promer ministro anterior cu te na ultimo tabata intimamente involucra den e negociacion tocante e ley? Claro cu nos lo haya awor un tiramento di culpa riba otro unda lo ta dificil pa conclui ken tin razon o no. Awor nos por tende cu tur cos ta pega ainda riba un supuesto analisis di Fondo Monetario Internacional (IMF) encuanto e normanan presupuestario cu mester bin na vigor cu e ley nobo, pero den tur e tempo recien aki, nos a tende exactamente un politico expresa preocupacion pasobra e conseho di e organismo internacional aki ta tardando demasiado. Nos mester conclui anto cu casi tur tabata contento cu e tardanza, pasobra tanten esey tabata andando, no mester a tuma posicion ni pro, ni contra e ley, cu e bentaha cu semper lo tin e contrincante politico local pa culpa. Te ki dia Aruba ta keda presencia e tipo di wega aki sin tuma paso? Awor, manera semper, ta na nos como pueblo pa paga e cuenta aki, cu ta core den decenas di miyones di interes extra pa aña. Envez di baha gasto di interes, den e tempo dificil cu ta warda nos, ta parce mas importante pa hunga e wega di culpa otro y no actua cu diligencia na fabor di comunidad. Ta pesey ta mihor pa conclui cu tur dos banda a sacrifica nos interes na fabor di interes politico partidario.

Candidato ministerial a bira ‘controversial’?

E otro asunto cu tin di haci cu papel di Reino ta toca solamente e partidonan den e actual coalicion. E incertidumbre encuanto nombramento di e ministro faltante pa completa e equipo di gobierno a cuminza bira otro circo politico mas. Segun e informacion duna localmente, tabata falta un informe di servicio di impuesto tocante e conducta den pasado di e candidato, cu pa un of otro motibo a tarda masha hopi mes. Cu e entrega di e rapport aki na Gobernador, ta duna e impresion cu pronto lo tin un claridad riba e asunto. Sin embargo, e propio promer mandatario den rueda di prensa ta duna e impresion, tratando na mes momento di no duna detaye indebido di su entrevista confidencial cu Gobernador, cu ainda tin problema na horizonte. Den un anterior Editorial nos a splica cu e proceso di screening na Aruba, segun ley local, ta solamente parti di e evaluacion cu ta tuma lugar, pasobra mester acepta e candidatonan na nivel di Corona pa nan por bira ministro. Claro cu semper politico local ta purba tapa e aspecto aki, cu no ta conveni pasobra e ta pone e poder di nombramento local den un luz di menos relevancia; nan no gusta admiti cu tin otro riba nan cabez cu finalmente mester dicidi ken ta bira ministro. Claro cu no por spera di promer ministro cu e ta bay divulga asunto confidencial discuti den e encuentro cu Gobernador, pero ta dificil pa nos kere cu e solo hecho cu servicio di impuesto a tarda tanto cu duna conseho, ta e unico obstaculo na caminda pa nombramento. Nos mester djis recorda algun proceso di evaluacion anterior unda no tabatin obhecion local, cu asina mes a pega despues riba mal reputacion di un politico den e evaluacion Hulandes, loke a conduci na rechazo di su candidatura. Mas recientemente, despues di hopi presion di su partido (nobo) a logra cu Hulanda a sucumbi pa presion, pa mira despues con su actuacion a conduci na e promer invasion hudicial riba centro di gobernacion, paralizando tur trabao pa haci un investigacion amplio eyden. Naturalmente esaki tabata un berguenza grandi, cu medionan di comunicacion a trata cu un cierto man suave, pa no aumenta e berguenza cu gobernacion a pone na cara di pueblo. En todo caso, nos por imagina cu Hulanda na e momento aki ta pensa cu “más vale prevenir que lamentar” y ta hibando un escrutinio riguroso den e caso actual, mientras e ‘tardanza’ local ta sirbi como cortina di huma pa desvia atencion di e berdadero problema. Ohala no ta asina, pero mester considera cu na e altura aki, ya e candidato por a bira asina ‘controversial’ cu e mihor opcion ta pa propone otro candidato… Na otro pais ta resolve e problema asina, dunando e candidato revoca un otro bunita puesto, pero na Aruba esey no ta traha asina…