Gobierno Hulandes a informa cu Wardacosta di Caribe a inverti hopi aña pasa den formacion y educacion di personal. E meta di gobierno ta pa Wardacosta crece bira un organisacion cu por opera independientemente 24/7 e aña aki. Pa e motibo ey mas o menos 70 funcion full-time lo ser agrega.
Wardacosta di Caribe ta e vinculo maritimo den e cadena di aplicacion di ley di e parti Caribense di Reino. Tareanan ta ser ehecuta pa Aruba, Corsou, Sint Maarten y e entidadnan publico Bonaire, Sint Eustatius y Saba. Wardacosta ta duna servicio manera buskeda y rescate, pero e trabou ta encera tambe tareanan di investigacion y supervision y e lucha contra traficacion di hende, contrabanda di droga y hende y inmigracion iregular.
E transformacion den un organisacion di 24 ora ta nifica cu Wardacosta tambe por ser desplega continuamente pafo di casonan di emergencia. E desaroyo aki, segun e gobierno Hulandes, ta rekeri un inversion den personal y ekipo. E meta ta pa traha pa medio di e asina yama Accion Policial Impulsa pa Inteligencia (IGP). Esaki ta basa riba recaudacion, procesamento, enrikecimento y analisis di informacion na tempo, dentro di e cuadronan legal.
Como gerente y doño di presupuesto, ministerio di Defensa ta responsabel pa Wardcosta. Ademas ministerio di Defensa por lo general tin un barco di stacion den Caribe, sinembargo den e prome parti di aña pasa no tabatin ningun barco di stacion presente. Esaki tabata debi na cu e marina tabata desplega den Laman Mediteraneo y Laman Cora pa varios mision.
Ademas, gobierno Hulandes ta indica, Wardacosta a hay’e confronta cu problema debi na scarsedad di personal y problemanan tecnico, y menos dia di nabegacion tabata envolvi. Esaki tabata specialmente berdad pa e barco Panther na Aruba. E inicio di e proceso di reemplaso a ser considera un di e proyectonan di ekipo mas importante pa 2024. E proyecto di capacidad di radar di costa di Windward Islands tambe a cuminsa aña pasa.
