E tema di economia ta uno di suma importancia. Pa Gabinete AVP-FUTURO e fundeshi di e maneho economico ta un crecemento y desaroyo economico inclusivo pa logra un reparticion mas husto di entrada y beneficio di e desaroyo economico di Aruba pa tur hende. Den nan plan di gobernacion nan ta presenta nan strategia y plannan pa logra yega na e maneho aki.

E meta di e maneho economico inclusivo di Gabinete AVP-FUTURO ta pa mehora e poder di compra; baha e costo di bida; baha gasto y agilisa e proceso di haci negoshi; mehora e clima di inversion; stimula participacion mas amplio di comunidad den economia; stimula diversificacion di Aruba su economia; y stimula un economia mas sostenible y duradero.

Dependencia di solamente un pilar economico ta un riesgo pa e desaroyo economico duradero di e pais. E punto di salida di e maneho economico di Gabinete AVP-FUTURO ta proyeccionnan economico cu ta mustra un nivel di crecemento economico real, cu ultimamente ta bahando door di finalisacion di proyeccionnan hotelero y menos actividad economico den sector di construccion.

Cu e panorama aki, gobierno nobo ta remarca ta urgente pa crea otro actividadnan economico cu ta inclusivo pa asina garantisa mas empleo di calidad halto y entrada husto pa tur hende. E crecemento economico ta necesario pa crea e entrada adicional pa gobierno y e primanan necesario pa financia e necesidad di fondonan di seguridad social y seguro medico general cu lo sigui crece.

Como economia chikito y habri, e dependencia di desaroyonan externo ta grandi. Aruba ta importa practicamente tur cos; di cuminda basico te cu productonan petrolero pa produccion di energia. Gabinete AVP-FUTURO ta enfatisa cu e dependencia aki ta urgi pa crea actividad economico diferente cu ta reduci e dependencia existente di exterior y crea un base economico mas duradero pa e pais.

Actividadnan, entre otro, den e area di energia renobabel, agricultura moderno cu uso di tecnologia, economia blauw, sector di tecnologia financiero internacional y industria creativo.

Pa logra un reparticion mas husto y pa tur hende parti den e beneficio di e desaroyo economico, gobierno lo usa e siguiente strategianan.

Mehora poder di compra (Plan Poder di Compra)

Pa mehora e poder di compra Gabinete AVP-FUTURO lo haci lo diseña y implementa un plan pa mehora forsa di compra, pa tur grupo den necesidad manera pensionado, e grupo di trahado cu ta cobra salario minimo, e ciudadano cu tin un condicion fisico of mental cu ta impedi nan di traha, entre otro.

Manera anuncia gobierno nobo lo aumenta e repartatieloeslag pa pensionadonan – cuminsando cu un suma di Afl. 250 pa luna entrante mei di 2025 – y lo sigui evalua con por sigui mehora e poder di compra di e pensionadonan.

Tambe lo formalisa e reduccion di loonbelasting cu a introduci na comienso di aña 2025 den Presupuesto 2025; lo formalisa e ampliacion di e belastingvrijevoet pa menos hende mester declara inkomensbelasting den Presupuesto 2025; lo laga analisa y fiha e nivel di entrada culo considera e liña di pobresa na Aruba, pa kita tur duda di e ken ta cay bou di e nivel di pobresa aki y pa por hiba un maneho integral y consistente pa combati pobresa den e pais cu prioridad.

Ademas di esaki Gabinete AVP-FUTURO lo introduci e ley di proteccion di consumidor pa proteha e consumidor y crea un mercado mas transparente y husto. Lo presenta e ley aki na parlamento y implementa door di Aruba Fair Trade Authority; y lo implementa e ley yama ‘Regeling Consumentenkrediet’ cu tin como meta ofrece consumidor un miho proteccion contra riesgo di credito, interes y gasto excesivo. A corto y largo plaso esaki lo contribui na un posicion financiero mas sano y mas stabiel pa famianan na Aruba.

Baha Costo di Bida (Plan Reduccion Costo di Bida)

Pa un impacto duradero, Gabinete AVP-FUTURO ta remarca, e maneho economico ta rekeri un colaboracion entre ministerionan cu e meta di haci y stimula inversionnan cu lo conduci na un reduccion mas grandi di gasto di famia manera cuminda, vivienda, utilidad, enseñansa y crèche, transporte y gastonan medico.

Pa e gobierno nobo e maneho pa baha costo di bida di tur hende mester ta basa riba un strategia na corto y largo plaso. P’esey lo diseña y implementa un plan di accion integral pa reduci Costo di bida (“Plan Reduccion Costo di Bida”) cu lo envolve tur ministerio y tur departamento di gobierno.

“Plan Reduccion Costo di Bida” lo enfoca riba reduci y mitiga e aumento den gasto di hogar di diferente forma. Pa baha gasto di cuminda Gabinete AVP-FUTURO lo haci lo evalua e uso di “Prijzenverordening” y e “Canasta Basico” cu e meta pa mitiga aumento di prijs di comestibel; lo implementa un proyecto pa facilita e transporte di producto pa Aruba y explora e aumento di importacion di productonan di paisnan den region manera Colombia, Surinam, Panama y Republica Dominicana.

Basa riba resultado di e investigacion di Aruba Fair Trade Authority “Marktonderzoek Voedingsmiddelen” gobierno lo inicia e dialogo cu e sector pa explora e manera pa reduci costo den e sector aki; lo construi e prome “Agri Innovation Park” pa aumenta e produccion local di fruta y berdura y stimula e produccion di fruta y berdura localmente yudando tecnologia cu ta compensa pa e limitacionnan di e clima, tereno y suela na Aruba.

Tambe lo evalua e uso di instrumentonan fiscal, financiero y di infrastructura pa stimula e produccion local di productonan di agricultura, cria y piscamento; lo stimula a corto plaso e aumento di produccion comercial di webo local; y lo inicia e importacion di productonan di carni for di Colombia y otro pais cu por ofrece e calidad cu ta desea na Aruba, na prijs mas abou.

Den nan plan di gobernacion Gabinete AVP-FUTURO ta splica detayadamente e diferente strategia y plan cu nan tin como meta pa implementa pa logra e obhetivo di un miho maneho economico. Lesa mas informacion den nos siguiente edicion di Bon Dia Aruba.