Manera ya ta conoci den comunidad tin un tendencia creciente tocante falta di confiansa den e poder hudicial pa motibo di incidentenan registra recientemente cu no a yuda pa reduci e desconfiansa creciente aki. Den nan programa di gobernacion Gabinete AVP-FUTURO ta remarca e importancia di restaura confiansa di comunidad back den poder hudicial y ta elabora plannan pa haci esaki y pa mehora maneho y funcionamento di esaki pa bienestar di tur.

Pa logra nan obhetivo a e gabinete ta delinea algun punto di atencion esencial den nan programa di gobernacion. Un punto di atencion importante ta e aspecto di prevencion.

Gobierno entrante tin como meta fortifica e posibilidad pa deteccion tempran den casonan di violencia domestico, delitonan sexual y sigui fortifica e unidad den cuerpo policial dedica na preveni, combati y persigui abuso di menor; nan lo duna mas atencion na prevencion y persecucion den casonan di violencia domestico y lo evalua e proyecto di “Polis di Bario”, duna mas contenido na un acercamento multidisciplinario y sigura un bon cooperacion cu tur actor den contexto di e concepto di “Veiligheidshuis.”

Ademas di esaki nan lo duna mas contenido na un maneho integral di trafico pa aumenta seguridad, mobilidad y eficiencia; lo contribui na un plan di accion integral di prevencion pa evita abuso sexual na cas, den enseñansa, den deporte y otro institucionnan; y lo fortalece resiliencia di hoben contra criminalidad mediante identificacion trempan y prevencion.

Den nan programa di gobernacion Gabinete AVP-FUTURO tambe ta pone atencion na mehora tur aspecto relaciona cu trato di victima. Nan tin como meta percura pa e trato di tur victima ta corecto, humano y sin niun prehucio; duna mas sosten na victima di crimen pa nan por hunga un rol mas importante y activo den nan propio caso, tambe si nan ta menor di edad.

Tambe tin como meta pa duna victima guia psicologico na tempo; duna polis training con pa anda cu victima hoben di e miho forma posible; y duna victima y nan famia informacion riba e desaroyo di nan caso conforme leynan existente.

Otro prioridad pa gobierno entrante ta combatimento di crimen cu impacto grandi den comunidad manera, entre otro, delito violento contra e ser humano, pero tambe crimen contra esunnan vulnerable, ladronicia, ladronicia cu violencia, crimen organisa y corupcion cu por mina e stabilidad di e sistema democratico, traficacion di droga y traficacion di hende.

Gabinete AVP-FUTURO ta subraya cu criminalidad ta desaroya cu tempo y esaki ta haci cu e cuerponan hudicial lo cambia accento y por cambia prioridad basa riba fenomeno criminologico durante e periodo binidero. Coleccion di informacion y analisis di data lo ta instrumental den e proceso aki.

Prevencion di criminalidad lo ta central den maneho di gobierno nobo reduciendo recidivismo den delincuencia. Ora yega na castigo, esaki mester ta efectivo pa coreccion di esunnan envolvi y rehabilitacion di esunnan culpabel pa nan por re incorpora den sociedad.

Alabes gobierno lo amplia e posibilidadnan pa recapacitacion di detencionnan den instituto correccional y lo haci uso di tecnologia moderno pa amplia posibilidad di formacion y rehabilitacion di detenidonan; lo sigura cu e detenido lo ricibi un bon guia di Reclassering na tempo; y lo introduci un sistema integral di retiro di permiso y deportacion di individuo cu comete cierto crimen.

Topico di adiccion tambe ta un punto di atencion pa e gabinete nobo. Acceso na droga y otro substancia prohibi ta hopi facil riba isla. Pa gobierno conscientisacion riba e tereno aki ta crucial y mester ta un esfuerso conhunto di sector publico y priva. Proteccion di frontera di pais lo sigui tin un prioridad pa Gabinete AVP-FUTURO. Den e programa di gobernacion ta señala algun punto con nan kier logra esaki.

Lo enfoca riba prevencion di adiccion trahando hunto cu fundacionnan pa brinda e cuadro necesario pa un servicio colaborativo, eficiente y efectivo; lo brinda yudansa na esunnan cu problema di adiccion of problema psicologico pa nan rehabilitacion den comunidad y na beneficio di seguridad en general; lo traha pa mehora seguridad a traves di prevencion y sigui combati consumo, benta y trafico organisa di droga pa medio di conscientisacion y actuacion represivo firme.

Ademas di esaki lo structura un trayecto debido di reintegracion cu enfasis riba desaroyo educacional y vocacional di detenido, specialmente riba area di ingenieria y tecnologia; lo reintroduci e maneho pa reduci presencia di adictonan ambulante riba caya den centro di Oranjestad y San Nicolas of persona cu a haya nan mes forsa pa biba y drumi riba caya y percura pa un maneho integral pa reduci cu e molestia y daño cu e personanan aki ta causa na comunidad y nan mes; y lo evalua efectividad di legislacion existente y analisa posibilidad pa introduci legislacion nobo pa atende cu e problematica di presencia di adicto ambulante riba caya na un forma mas efectivo.

Otro tema di importancia pa Gabinete AVP-FUTURO ta esun di inmigracion. Aruba conoce actualmente un porcentahe halto di personanan indocumenta. For di nan punto di bista, maneho pa cu esaki di e ultimo añanan no a contribui na mitiga entrada di ilegal na Aruba y tampoco soluciona e retonan di personanan indocumenta.

Nan ta remarca cu personanan indocumenta no ta contribui suficiente na e caha di gobierno y hopi biaha ta bira victima di personanan cu ta probecha di nan situacion delicado den comunidad. Pa atende cu e problema aki, gobierno nobo lo introduci un maneho husto y transparente di admision y integracion di stranhero, basa riba e necesidad di isla y acopla na e desaroyo economico.

Lo stimula un cooperacion internacional y interinsular pa limita y finalmente combati entrada ilegal y traficacion humano; lo fortalece proteccion di frontera a traves di accion preventivo y represivo; lo evalua na ki forma por implementa un maneho pa legalisa personanan indocumenta cu ta biba y traha caba na Aruba; y lo evalua e reapertura di e frontera cu Venezuela, den combinacion cu un control severo pa garantisa cu esunnan cu bin Aruba como turista ta bay bek tambe y lo inicia un dialogo cu tur e stakeholders pa percura cu e maneho ta uno eficiente y prudente.

Como ultimo punto di atencion den e topico di husticia tin seguridad di animal. Pa Gabinete AVP-FUTURO e seguridad y bienestar di tur animal no ta garantisa, y gobierno ta enfatisa cu proteccion di animal ta hunga un papel fundamental den proteccion di biodiversidad.

Gabinete AVP-FUTURO ta reconoce cu specialmente pa cacho y pushi, cualkier plan di accion ta keda rekeri e compromiso di henter comunidad. Aunke cu desde 2015 e ley di cacho a drenta na vigor, ainda nuebe aña despues, e reto ta hopi grandi.

Den nan maneho pa mehora e situacion di seguridad di animal, gobierno lo implementa diferente programa di conscientisacion y lo continua cu e introduccion di registracion (chip) obligatorio di cacho; lo empodera KPA den bario pa continua cu control necesario y duna boet ora no tin cumplimento; lo sostene programa structural na tur scol riba e importancia di proteccion di animal y kico esey ta nifica pa biodiversidad; lo sostene centralisacion di liñanan di contacto entre organisacion/fundacion activo cu introduccion di un number di telefon central; y lo recomenda uso di programa di sterilisacion na esunnan cu tin reto cu cuido di animal.