Ayera tardi prome minister Mike Eman a tene un reunion cu Gobernador di Aruba SE Alfonso Boekhoudt. Durante e reunion aki e mandatario y Gobernador di Aruba a toca riba e tema di celebracion di Dia di Rey como tambe e tema cu hopi den comunidad ta pendiente di dje, esta e screening di candidato pa minister Mike de Meza.

Pa locual ta trata celebracion di Dia di Rey, specificamente ki dia lo ta oficialmente liber teniendo na cuenta cu Dia di Rey ta cay riba un dia cu ya ta liber diadomingo, prome minister Eman a informa cu a tuma e decision pa duna diasabra como dia liber.

En conexion cu Dia di Rey tambe ta tuma luga e condecoracionnan real. Relaciona cu esaki prome minister Eman a indica cu diabierna mainta hunto cu Gobernador di Aruba lo tin e momento di conocemento di esnan cu ta ser condecora y diabierna anochi tin e recepcion caminda cu ta cuminsa celebra e cumpleaños di Rey.

Ademas di esaki, el a argega, diabierna tambe lo tin e momento oficial caminda lo honra tributo na Papa Francisco cu a fayece.

Bayendo riba e tema di screening di candidato pa minister, parlamentario Mike de Meza, e mandatario a splica cu durante e reunion cu Gobernador di Aruba el a bolbe entrega documentonan adicional cu e fiscalistanan di parlamentario De Meza a entrega na su persona.

El a sigui splica cu den e documentonan tin splicacion detaya cu ta indica cu Sr. De Meza ya a paga tur locual ta su obligacionnan di belasting durante añanan anterior, y ademas ta duna un relato amplio tocante e cumplimento di parlamentario De Meza pa loke ta trata belasting.

Prome minister Eman a remarca cu ta importante pa realisa cu ora ta papia di reputacion di un persona, e ta algo hopi grandi y e persona tin no solamente e derecho, pero e obligacion pa lucha pa mustra kico realmente a tuma luga.

Den e caso aki, el a menciona, De Meza y su fiscalistanan a produci hopi documento pa mustra cu en realidad locual tabata e inkietud pa su posicion, den e forma con nan ta articul’e, nan ta mira cu e no ta algo cu mester impedi De Meza pa bira minister.

“Nos conoce Sr. De Meza tambe como un persona cu a entrega pa e pais aki, cu a traha, a cera su companianan, hustamente pa sirbi e pais aki, durante tur e añanan cu el a scoge pa e bira minister y despues parlamentario, practicamente e no tabatin companianan mas, companianan cu por cierto tabata companianan sumamente prospero cu el a cera haciendo escogencia pa servicio publico. Esey mi ta kere ta algo cu tin cu ser tuma den consideracion den henter e proceso aki y ser respeta tambe,” el a remarca.

Miembro di prensa a puntra prome minister kico ta e situacion e ora cu DIMP, ya cu na final e departamento ey tin cu duna luz berde pa parlamentario de Meza por bira minister. E mandatario a splica cu esey ta corecto y esey ta e disputa cu tin na e momentonan aki cu e fiscalistanan di impuesto cu ta basa nan documentonan riba cierto puntonan y di parti di e fiscalistanan di Sr. De Meza ta opone e partinan aki.

El a agrega cu di locual el a compronde ta cu e caso aki lo por termina den corte. “Mi tin indicacion cu si no bin un apertura cu e caso aki por termina den corte caminda e fiscalistanan di Sr. De Meza lo bisa esaki ta e cosnan cu ta ser bisa y segun nos fiscalistanan nos tin un otro opinion riba esey. Esey sigur lo por trece un claridad tambe pasobra ora papia di temanan fiscal e ta bira un poco complica pa otronan husga y bo mester expertonan pa husga,” el a señala.

Prome minister Eman un biaha mas a declara cu no tin duda cu Sr. De Meza a cumpli cu tur su pagonan cu mester a cumpli cune y loke aworaki ta den disputa ta e parti di si durante e periodo ey a geef aan cierto cosnan of cosnan cu e fiscalistanan ta discuti.

“Pa nos, laga mi bisa esaki como lider politico, lider di AVP, cu candidato number dos di AVP riba lista, mi nunca a mira otro cu un persona cu a dedica pa sirbi e pais aki, nunca mi a mira ningun luho banda di sr de Meza. Mi a mira un hende cu den su carson cortico ta cana den su barionan, ta semper oyente pa su pueblo, mi no a mira un hende cu auto grandi, of cu boto grandi, of cualkier cos cu ta mustra di un hende cu ta hiba otro bida cu un bida basa riba servicio publico cu mester duna na nos comunidad. P’esey mi ta kere e merece un proceso hopi husto cu na e momentonan nos ta dunando e espacio p’esey tambe pasobra nos ta papiando di e bon nomber y e respet cu un persona merece den comunidad aki,” el a

Contestando pregunta tocante e periodo anterior cu Sr. De Meza tabata minister caba y con e lo a pasa e prome screening, teniendo na cuenta e periodo cu DIMP ta bayendo back na dje pa loke ta su cumplimento, e mandatario a indica cu esey ta algo cu e no por drenta den e detaye pasobra na final di dia ta papiando di cosnan priva.

Na mesun momento el a indica si cu e ley tabata diferente e tempo ey. E tempo practicamente si un hende ta bay bira minister y ainda tin algo pendiente, ora e pag’e of yega na un areglo esey tabata practicamente loke tabata ser midi. Pero aworaki, el a splica, e ta ser corta den dos fase. Uno ta e “fiscal gedrag”, cu ta tocante e cumplimento y despues ta bin e parti di pago.

El a agrega cu eynan ta unda cu si e persona cumpli mes despues cu tur su pagonan, toch ta keda mira cu e periodo di cumplimento. Y esey ta e discusion cu tin cu e fiscalistanan di DIMP cu ta bisa un cos y e fiscalistanan di Sr. De Meza ta bisa otro.

Prome minister Eman a subraya cu si nan no por sali afo di e situacion aki, e ora probablemente e caso lo bay corte pa corte por dicidi si berdaderamente esaki ta un bon analisis.

E mandatario a splica cu na e momentonan aki Gobernador di Aruba ta na altura di tur argumento y lo haci su ehercicio. El a indica cu di parti di Sr. De Meza a bisa cu si no tin claridad, e ora ey p’s ta hopi importante pa su bon nomber tambe cu e lo hiba e caso corte pa corte mes husga wak locual un ta bisa, wak kico e otro bisa.

“Finalmente mi ta kere un decision di corte lo por trece hopi claridad den esey y kita e aspecto politico tambe, y dicidi den un forma profesional con ta cana. Na mi parecer Sr. De Meza pa su carera, pa su dedicacion pa nos pais, merece di haya tempo y merece di haya un trato husto pa por cana e caminda ki te unda cu e recursonan duna,” el a remarca.

Pa loke ta e funcionamento di Gabinete AVP-FUTURO cu seis minister solamente, el a splica cu e situacion ta pone un peso grandi riba minister Dowers den e caso aki cu ta cargando e cartera di e di siete minister, ken lo mester tabata De Meza.

El a indica cu den e dianan aki probablemente minister Dowers lo ta mirando tambe riba algun consehero cu e lo por pone banda di dje cu tin conocemento specifico riba e temanan cu e minister De Meza lo a atende cune. E ora ey ta bay haya un refuerso di parti di conseheronan cu por yuda pa e cartera di e candidato minister De Meza por sigui cana mientras cu ta wardando e proceso aki.