Den nan programa di gobernacion Gabinete AVP-FUTURO ta delinea nan plannan pa mehora diferente aspecto, den diferente sector cu a conoce un deterioro. Un di e sectornan aki ta e cadena hudicial. Gobierno nobo tin como punto di atencion mehora no solamente confiansa di comunidad den e sistema hudicial, pero mehora e maneho y funcionamento di esaki pa bienestar di tur.

Gobierno entrante ta remarca cu den ultimo tempo tin un tendencia creciente den comunidad tocante falta di confiansa den e poder hudicial. Incidentenan registra recientemente y e reaccion di gobierno no a yuda pa reduci e desconfiansa aki.

Segun Gabinete AVP-FUTURO tin un falta di vision y strategia pa cambia e tendencia aki, ademas cu no tin suficiente atencion pa prevencion di crimen, specialmente pa hobennan. Nan ta subraya cu e maneho preventivo contra uso di droga ta laga hopi di desea, cuido pa adiccion ta segmenta y falta atencion.

Ta conoci cu hopi criminal ta cuminsa nan carera cu acto criminal di impacto abao y hopi biaha esaki ta pasa sea bao di influencia di droga y tambe alcohol. Gobierno nobo ta enfatisa cu inversion den prevencion di crimen bou di hobennan ta di vital importancia pa por logra mantene un sociedad sigur den largo plaso. Proteccion di comunidad ta rekeri atencion special pa e departamentonan cu tin cu proteha e frontera.

E gabinete entrante ta indica cu departamentonan cu ta combati y preveni crimen organisa y crimen transnacional tin mester di mas apoyo. Nan ta remarca cu combatimento di criminalidad ta un proceso largo y complica, y ta rekeri esfuerso di hopi departamento y organisacion den comunidad. Un acercamento multidisciplinario y integral ta keda un aspecto necesario.

“Pueblo mester biba den trankilidad y confia cu gobierno ta haci su maximo esfuerso pa proteha nan, nan famia y nan propiedad. Fomenta y restaura e confiansa di sociedad den nos sistema hudicial lo contribui na e legitimidad di gobierno, specialmente riba e tereno di husticia y uso di monopolio di poder pa garantisa seguridad en general. Esaki ta un prioridad cu lo garantisa e integridad di gobierno, aplicando strategia formal y eficaz pa preveni y combati criminalidad, e lo fortalece y haci nos estado di derecho mas resiliente,” e gabinete a enfatisa.

Pa e gobierno entrante ta importante pa na momento cu constata un falta di confiansa di pueblo, pa tuma paso pa para e tendencia aki y haci tur esfuerso pa demostra cu e organonan di husticia ta actua imparcial, diligente, corecto, cu respet pa derecho humano y eficiente den investigacion, persigui y percura cu nada ta keda scondi y cu husticia semper ta prevalece.

“Responsabilisacion pa medio di analisis y investigacion, ta un condicion “sine qua non” di democracia. Semper mester reina e sentimento cu henter e cadena hudicial ta actua husto, imparcial den forma consistente y efectivo contra tur forma di criminalidad y ta proteha nos estado di derecho y e derechonan di tur victima y sospechoso,” gobierno ta agrega.

Gabinete AVP-FUTURO ta remarca cu e instituto coreccional KIA pa hopi aña no ta funciona optimal. Riba tur tereno ta haci esfuerso grandi cu poco resultado pa motibo cu e instituto no ta cumpli cu e normanan mas basico cu e infrastructura di un prison moderno mester cumpli cune. Gobierno ta indica cu como cu KIA ta e ultimo link den e cadena hudicial, mester dun’e su debido atencion den cuadro di mehoracion y reestablecemento di confiansa den y aumento di e efectividad di e sistema hudicial.

Den e siguiente periodo di gobernacion Gabinete AVP-FUTURO ta sigura cu lo haci tur esfuerso pa fortifica e confiansa y sigura e actuacion imparcial y efectivo di husticia. Nan lo implementa den cooperacion cu instancianan den reino, evaluacion di e calidad interno di e organisacion y e calidad di servicio brinda.

Preveni y combati infraccion di ley, ilegalidad y tur forma di criminalidad ta responsabilidad di e departamentonan di husticia. E impacto di e crimen, riba sociedad lo determina e prioridad den e maneho di husticia. For di e perspectiva aki, e siguiente puntonan lo haya prioridad den e maneho di husticia di Gabinete AVP-FUTURO.

Un di e puntonan di atencion ta integridad y maneho eficiente. Esaki lo inclui incorporacion di codigonan di comportamento den tur organisacion hudicial y implementacion di supervision efectivo, y pa evita conflicto di interes y aumenta calidad y integridad.

E aspecto di tin organisacion tambe ta un punto di atencion. Esaki ta inclui reestablece confiansa den henter e cadena di husticia pa asina laga ningun duda cu e sistema di husticia di Aruba ta actua imparcial, diligente y efectivo den investiga, persigui y trece husticia den tur caso y di tur forma di crimen segun e plannan di maneho anual di cada departamentonan di husticia.

Gabinete AVP-FUTURO tin como meta tambe trece e capacidad humano di tur cuerpo di husticia na e nivel necesario pa nan por ta efectivo y evita desgaste di personal; fortifica e Academia di Polis cu e meta pa sigui hiba e nivel profesional di miembronan di cuerpo di polis y otro cuerponan pa reduci criminalidad mas efectivamente; stimula y aumenta cooperacion di Cuerpo di Polis cu cuerponan di polis regional y den Reino pa intercambia conocemento y experiencia; y percura pa e material necesario pa cuerponan di husticia ta na e nivel rekeri pa por actua efectivamente.

Gobierno lo evalua funcionamento di e departamentonan hudicial vital pa sigura cu nan tin e vision, capacitacion y procesonan necesario pa brinda comunidad e nivel mas halto den e forma mas imparcial posible; lo evalua e composicion y organisacion di e servicionan hudicial pa funciona mas efectivamente y eficiente posible; lo evalua y restructura procesonan di Cuerpo di Polis pa reduci overtime, brindando personal ademas di procesonan adecua, un ambiente di trabao mas optimal; lo atrae mas trahado terapeutico (entre otro trahado social) den e sistema hudicial; lo inicia e proceso pa yega na construccion di un instituto di coreccion nobo; lo crea mas “checks and balances” den institucionnan den e comunidad pa conscientisa y asina combati influencia di mundo baho den nos institucion; y lo evalua si por bin cu un Directie Justitie pa asina mehora continuidad.

Pa loke ta trata e aspecto di tecnologia, gobierno nobo tin como meta haci mas uso di tecnologia moderno pa preveni, detecta y persigui crimen, y crea un maneho integral pa preveni y combati crimen cibernetico.

Den e parti di legislacion, Gabinete AVP-FUTURO lo traha pa revisa y actualisa castigonan penal y boet, y lo revisa y actualisa leynan di, entre otro trafico y ley pa proteccion di cacho.

Pa loke ta trata prevencion, gobierno entrante tin como meta fortifica e posibilidad pa deteccion tempran den casonan di violencia domestico, delitonan sexual y sigui fortifica e unidad den cuerpo policial dedica na preveni, combati y persigui abuso di menor; nan lo duna mas atencion na prevencion y persecucion den casonan di violencia domestico y lo evalua e proyecto di “Polis di Bario”, duna mas contenido na un acercamento multidisciplinario y sigura un bon cooperacion cu tur actor den contexto di e concepto di “Veiligheidshuis.”

Lesa mas di e puntonan di atencion di Gabinete AVP-FUTURO pa mehora e sistema hudicial di pais Aruba den nos siguiente edicion di Bon Dia Aruba.