(NLTimes)—Hende muher na Hulanda ta scoge cada bes mas pa haya yiu na un edad mas halto, segun un rapport di NOS. Sociologonan ta atribui e cambio aki na factornan manera desaroyo personal, preocupacion financiero, y e yamado “castigo di maternidad” — esey ta e impacto negativo riba carera cu hopi muhe ta experencia despues di haya yiu. Expertonan ta indica cu e tendencia ta refleha un cambio mas grandi den e rol y expectativanan pa hende muhe den sociedad.

Segun Tanja Traag, sociologo principal di CBS, e tendencia pa haya yiu mas laat a bira evidente for di añanan 1980, cu mas hende muhe riba 35 aña cayendo na estado. Den 2023, un averahe di hende muhe Hulandes a haya nan prome yiu na un edad promedio di 30.3, compara cu 29.4 un decada prome. E cambio aki no ta exclusivo pa Hulanda; paisnan manera Merca tambe ta mirando e mesun patronchi aki, cu pa prome biaha den historia na 2023, mas hende muhe riba 40 aña a haya yiu compara cu hende muhe adolescente.

Hende muhe ta enfoca mas riba nan desaroyo personal y independencia financiero

Lonneke van der Berg di Instituto Demografico Interdisciplinario di Hulanda (NIDI), ken ta studia adolescencia, ta nota cu hopi hende muhe den edadnan di 20 aña y 30 aña ta warda pa tuma pasonan importante den bida, manera sali for di e cas di nan mayornan, co-habitacion, y forma famia. Van der Berg ta indica un enfoke creciente riba desaroyo personal, cu hende muhe poniendo mas prioridad riba educacion, desaroyo di carera, y independencia financiero, en bes di cuminsa un famia trempan.

Pa esnan sin educacion mas halto, preocupacion financiero ta un motibo importante pa warda pa haya yiu, segun Van der Berg. E ta splica cu incertidumbre den e mercado di vivienda y trabao, hunto cu e gastonan halto di cuido di mucha, ta contribui na e retraso. “Esey ta un desaroyo preocupante,” Van der Berg a conta NOS.

Retraso no ta necesariamente algo negativo

Van der Berg ta enfatisa cu pa warda pa haya yiu, of hasta laga e deseo tras, no ta necesariamente algo negativo. Hopi hende muhe ta mira e libertad pa biaha y falta di un hogar fijo como un bentaha. Esaki ta parti di un cambio social mas amplio cu ta acepta mas e idea pa inverti den bo mes y bo carera prome, prome cu bo cria yiu.

Awendia, mas hende muhe compara cu hende homber ta gradua cu diploma di educacion mas halto, y Van der Berg ta sugeri cu hende muhe kier gosa di e fruto di nan exito academico y profesional prome cu considera maternidad.

Castigo di maternidad ta un factor grandi

E yamado “castigo di maternidad” tambe ta un factor crucial den e decision pa warda of retira e deseo pa haya yiu. Dr. Hanneke Takkenberg, un experto di Erasmus MC, a comparti su experiencia personal di e reto profesional despues di haya yiu. “Ora mi a cay na estado, nan a puntra mi cuanto dia despues di parto lo mi cuminsa traha atrobe – algo cu mi no ta kere nan ta puntra hende homber,” el a conta NOS.

E ‘castigo’ aki ta ser refleha den e caida di ingreso pa hende muhe, e cantidad di oranan di trabao, y e contribucion pa pension di hende muhe despues di haya yiu, mientras cu e careranan di hende homber en general no ta ser afecta.

Tratamentonan di fertilidad ta birando mas comun

Aunke cu fertilidad di hende muhe ta baha mas rapido despues di 35 aña, sperma di hende homber ta experencia un caida mas lento. Como resultado di e aumento den embaraso mas laat den bida, hopi pareha na Hulanda ta busca tratamentonan di fertilidad manera IVF (fertilisacion in vitro). Pero, IVF ta un proceso intensivo cu ta inclui tratamentonan hormonal, sacamento di eicel, y implantacion di embryo.

Takkenberg, ken ta parti di un centro nobo di investigacion na Rotterdam riba salud di hende muhe, ta enfatisa cu reproduccion medicamente asisti ta birando mas comun pasobra hende muhe ta scoge pa haya yiu mas laat den bida. “Mas pareha ta scoge pa IVF pa motibonan manera infertilidad no-intencional, parcialmente pasobra nan ta cuminsa traha famia mas laat,” el a bisa.