Lo torpedea atrobe…Ley di Reino…?

Siman pasa, probablemente anticipando tratamento di e propuesta nobo di ley di Reino di supervision financiero, fraccion di e partido social-democrata, awor den oposicion, a manda un serie di pregunta pa e ministro encarga cu finanzas y asunto economico, encuanto e topico aki. E lista completo di pregunta ta inclui den e edicion aki. E tono di e preguntanan ta indica, segun nos opinion, un posible repiticion di loke a pasa cu e anterior propuesta di ley di Reino (RAft), cu parlamento di Aruba a rechaza, bloqueando asina un ley di Reino a base di consenso.

Banda di e hecho cu ta keda responsabilidad di e mandatario pa contesta e preguntanan segun su deseo y pensamento, a yama ademas nos atencion cu varios di e preguntanan ta supone un trasfondo historico cu segun nos no ta cuadra cu loke nos a experimenta durante e ultimo añanan, unda un ley di Reino a bira un deseo cada vez mas inisistente di gobierno Hulandes.

Ta haci e ministro concerni e pregunta pakico mester di un ley di Reino, si “Aruba tin surplus, Aruba ta cumpli cu tur e normanan financiero ancra den e ley di supervision financiero (LAft), Aruba ta cumpliendo cu tur su obligacionnan y Aruba tin perspectiva positivo?” E hechonan menciona riba nan mes ta corecto, pero realidad ta cu a pesar di esey y pa otro motibo Hulanda a keda insisti den un ley di Reino.

E pregunta ta realmente pidi pa un contesta contundente, cu sin embargo esun cu a haci pregunta no lo gusta.

Hecho ta cu e ley di Aruba, di supervision financiero, por a keda funciona masha bon, aunke Hulanda semper tabata desea, na su debido tempo, cambia esaki pa uno di Reino. E oportunidad cu Hulanda a haya pa exigi awor un ley di Reino a ser duna exactamente pa e mesun fraccion parlamentario cu awor ta haci pregunta. Pa refresca memoria: den e protocol acorda y firma na november 2018, pa e promer ministro di nan partido, a keda conveni cu lo a haci cierto cambio den e ley local. Sin embargo, tabata e fraccion social democrata cu tabata sostene gobierno, cu a haci uso di e ocasion pa mustra nan supuesto ‘autonomia’ di e gobierno aliado y dos parlamentario a pasa pa ‘delete’ gobierno di Reino for di e texto di ley y a pone parlamento di Aruba como organo cu poder di decision na su lugar. E cambio di ley aki, di indole infantil y no acorda asina den e deliberacion cu e secretario di estado Hulandes di e tempo ey, no a bira efectivo nunca pasobra e promer mandatario, sin duda bao di e menaza Hulandes di no laga Gobernador firma e cambio di ley, a haci cu e proyecto absurdo di e fraccion social-democrata a termina den un lachi di e promer ministro cu a caba di retira di su funcion.

Un argumento contra un ley di Reino, si un persona ta desea di opina esey, cu nos no ta mira ningun caminda den e discusion encuanto e necesidad di e ley aki, ta bay hustamente contra e mal experiencia cu Hulanda tabatin, cu ta palabra algo cu gobierno local, hasta pone esaki den un protocol, y ora mester pasa adaptacion di ley, e fraccion ta torpedea loke nan gobierno a acorda. Hulanda no tin gana di mas cambio no desea den un ley local, cu realmente nunca mester tabata un ley local mes, y ta desea di hinca cuadro legal di e supervision den un ley di Reino.

Otro aspecto cu no por a falta den e preguntanan ta e debate tocante perdida di ‘autonomia’, pa cual nos no ta mira motibo. E ‘autonomia’ di Aruba a keda limita, o ‘entrega’ si ta desea di formul’e asina, na 2014 y definitivamente na 2015 cu e introduccion di e ley local. Bon pa corda tambe cu e ley local tabata propuesta di gobierno di Aruba di e tempo ey, pa evita cu lo a haya un ley di Reino, y no via consenso, sino via un Decreto Real di imposicion di ley di supervision financiero. Nos no ta mira pakico e traslado di e supervision pa un ley di Reino mester limita autonomia mas ainda, si tanto e rol supervisor di gobierno di Reino, y di otro banda e derecho di planifica, presenta, aproba y ehecuta presupuesto ta keda den man di Aruba. E supervision, tanto anterior na, como despues di aproba presupuesto, y di su modificacionnan, no ta cambia y ta bay cumpli 10 aña den funcion caba.

Otro argumento cu atrobe no por falta ta cu e dos otro islanan a bay di acuerdo cu un ley di Reino, a cambio di un saneamento di nan debe publico, y pakico Aruba no? Manera describi anteriormente, na Aruba tabata trata di un situacion di emergencia, segun gobierno Hulandes, cu tabata exigi nan intervencion. Sin embargo, un intervencion unda, aplicando e ‘straightjacket’ di supervision cu tabata existi caba desde 2010 pa e otro islanan, lo tabata suficiente pa coregi e rumbo financiero. Si e curso di accion den e ultimo 10 aña a proba cu e mesun medida di saneamento di debe mester a tuma lugar, lo keda na opinion di cada un. En todo caso, manera e fraccion opositor mes ta señala, Aruba ta riba bon caminda, salvo naturalmente e ultimo acontecimentonan internacional cu probablemente lo exigi un maneho supercuidadoso di e gobierno nobo. Finalmente ta keda e pregunta clave: atrobe e partido lo torpedea e propuesta cu nan propio lider a yuda prepara te na ultimo?