Recientemente mediante un publicacion riba su pagina oficial di Facebook, minister di Deporte, Gerlien Croes, a informa cu lo atende cu situacion relaciona cu uso di Compleho Deportivo di Simeon Antonio. E mandatario a pidi Fundacion Lotto pa Deporte (FLpD) y Federacion Facilidadnan Deportivo (FFD) tur documento pa investiga y trece claridad den e situacion aki.
Den su publicacion e mandatario ta splica cu como minister entrante el a hereda un situacion unda cu tin acuerdonan haci y discusionnan cu ta ser hiba ariba maneho di e facilidadnan deportivo.
El a sigui splica cu varios decision ta ser tuma unda cu ta cuestiona e base huridico pa esakinan y cumplimento debido basa riba e acuerdonan haci, for di cual como minister di Deporte e tambe ta responsabel.
El a indica cu e minister di deporte saliente a haci algun compromiso y pa e motibo ey aworaki como minister di Deporte entrante e ta encontra cu un situacion caminda cu tin varios partido ta sinti nan mes den incertidumbre.
Pa trece claridad den e situacion y calma preocupacion di e partidonan cu ta den incertidumbre, e mandatario a haci peticion na Fundacion Lotto pa Deporte (FLpD) y Fundacion Facilidadnan Deportivo (FFD) pa comparti tur documentacion cu tabatin di tur acuerdonan haci durante e ultimo 20 aña y tambe notulanan di decisionnan tuma recientemente di directivanan concerni.
El a menciona cu algun documento a ser ricibi caba y cu e lo yama un reunion cu e partidonan concerni.
“Transparencia y ‘good governance’ tin cu lidera cada decision cu nos ta tuma y mundo di deporte mester conoce algun cambio real, no solamente cosmetico,” el a finalisa.
Segun informacion e situacion cu a bin dilanti cu a crea un incertidumbre pa loke ta trata specificamente uso di Centro Deportivo di Simeon Antonio ta cu a stop casi tur usuario pa haci uso di e compleho aki. Fundacion Facilidad Deportivo (FFD) tabata huur e facilidad aki, pero na algun momento a ricibi un notificacion cu ningun otro federacion deportivo por usa e facilidad aki, a pone un stop pa tur otro persona practica deporte den e compleho y e federacion di gimnasia so haci uso di e facilidad. Awor e situacion ta cu ningun hende por haci uso di e facilidad pasobra a pone un stop na e uso pa tur hende.
Despues di e publicacion di minister actual di Deporte, Gerlien Croes, Gabinete Wever-Croes II mediante e pagina di Facebook di Gabinete Wever-Croes, cual ainda ta activo aunke nan no ta gobierno di Aruba mas, a reacciona riba e publicacion di e mandatario.
Den nan publicacion e gabinete saliente a sigura cu e decision di e fundacionnan pa cu Centro di Bario Simeon Antonio no tabata di Gabinete Wever-Croes.
E gabinete saliente a sigui indica cu reglanan di “corporate governance” ta prohibi gobierno pa mete den e fundacionnan y cu e unico cos cu minister di deporte saliente a pidi fundacion Lotto pa Deporte ta pa no sigui cu su intencion di traspasa e facilidad pa otro fundacion.
Por ultimo e gabinete saliente a indica cu despues di nan a entrega retiro a nota cu a firma e acuerdo.
