(AP) – Drake awo a trece dilanti keha tocante rapper rival Kendrick Lamar su interpretacion di “Not Like Us” na e aña aki su Super Bowl, agregando esaki na su demanda di difamacion contra Universal Music Group a causa di e cantica y su acusacionnan di pedofilia contra Drake.
“E cantica a forma parti di 2025 Super Bowl y a emiti na e audiencia mas grandi di Super Bowl Halftime Show den historia, cu mas di 133 miyon persona, incluyendo miyones di mucha y miyones mas cu nunca antes a tende e cantica of esnan cu a bin prome cu esaki,” e demanda a detaya diaranson na corte federal di Manhattan.
E ta agrega, “esaki ta e prome, y ta spera cu e lo ta e ultimo,” Super Bowl Halftime a orkestra e asesinato di e caracter di otro artista.”
Aunke Lamar a kita e palabra “pedofiel” cu ta den e cantica durante e show, e hecho cu esaki a keda omiti ta demostra cu “tur hende ta compronde cu e ta difamatorio,” e demanda ta bisa. Tambe esaki ta acusa cu Universal Music a usa beneficio financiero y relacionnan den negoshi pa garantisa cu e lo ta e acto principal na Super Bowl, y a promove e presentacion.
“Drake su keho aregla ta haci cu e caso cu ya caba tabata fuerte, bira uno mas fuerte ainda,” e abogado, Michael Gottlieb, a bisa den un declaracion. “Drake lo expone e evidencia di UMG su mal conducta, y UMG lo mester para responsable pa e consecuencia di su decisionnan cu mal intencion.”
E aña aki su Super Bowl Halftime Show tabata esun mas mira den historia, segun Nielsen.
Den un declaracion cu a responde na documento di corte, Universal Music, cual ta e compania di ambos artista, a sigui nenga Drake su acusacionnan. “Drake, indudablemente un di e artistanan cu mas exito den mundo y cu ken nos tin un relacion exitoso di 16 aña, ta mal guia pa su representantenan legal y ta tumando un paso legal absurdo tras di otro,” e compania a declara. “E ta bergonsoso cu e actonan kens aki ta sigui.”
Un vocero di Drake a bisa den un declaracion prepara cu e artista ta “teniendo e congolomerado di musica mas grandi na mundo responsable pa su accionnan y ta haci esaki sin miedo.”
E demanda nobo aki ta agrega tambe cu porcionnan difamatorio di “Not Like Us” a toca na Grammy Awards den februari, ora cu e cantica a gana 5 premio, incluyendo Song y Record of the Year. E demanda ta acusa cu Universal Music tambe a yuda garantisa e nominacionnan di GRammy y a permiti pa e cantica toca na e ceremonia.
Drake a demanda Universal Music, pero no Lamar, pa dañonan cu no a revela den januari, bisando cu e compania a publica y promove “Not Like Us” a pesar di su acusacionnan falso di pedofilia y sugerencia pa esnan cu scucha e cantica tuma husticia den nan propio man.
Como resultado di esaki, segun e demanda, intrusonan a los tiro riba guardia di seguridad na Drake su cas den Toronto y a purba drenta e cas 2 biaha, acoso y odio online, un golpi na su reputacion y un disminucion den e balor di su marca prome cu el a renegocia su contract cu UMG e aña aki. E demanda aregla ta agrega mas comentario online unda ta indica cu hende ta kere den e acusacionnan di pedofilia.
Drake, di 38 na y Lamar, di 37 aña, tin añanan ta pleita cu otro den media, Nan pelea ta un di e mas grandi den hip-hop den añanan recien.
Ambos tabata colabora ocasionalmente mas di 1 decada atras, pero Lamar a cuminsa ataca Drake publicamente den 2013. E pelea a escala grandemente aña pasa, cu ambos lansando ‘diss track’ pa otro, incluyendo Lamar su “Not Like Us.”
Den su mocion pa anula e demanda, Universal Music ta bisa cu Drake a yuda motiva e pelea cu su propio canticanan contra Lamar cu a empeora e problema. “E victima, un di e artistanan mas exitoso den historia, a perde un bataya di rap cu e la provoca y den cual el a participa conscientemente,” e mocion ta bisa. “Na luga di acepta e derota manera e artista di rap sin problema cu hopi biaha e ta bisa e ta, el a demanda su propio compania den un intento mal guia di cura su heridanan.”
