Den un serie di pregunta fuerte y directo, Parlamentario Dangui Oduber a pidi claridad for di Minister di Finanzas, sr. mr. Geoffrey Wever, tocante su postura riba e posibel aceptacion di un Rijkswet pa supervision financiero na Aruba. Segun Parlamentario Oduber, e implicacionnan di e rijkswet aki lo mina e autonomia di Aruba y e autoridad di su Parlamento.

Minister Wever a declara recientemente cu e consecuencianan lo ta demasiado devastador financieramente si Aruba no acepta e rijkswet. Parlamentario Oduber ta cuestiona e declaracion aki y a entrega 30 pregunta na e minister.

E preguntanan di Oduber ta basa riba e motivacion tras di acepta un Ley di Reino pa Supervision Financiero, yama hopi biaha den discusionnan politico simplemente “Rijkswet.” E pensamento di Oduber ta cu si tin surplus, Aruba lo mester por cumpli cu su obligacionnan financiero y no mester di supervision directo for di Hulanda. Entre otro, Oduber ta expresa preocupacion riba e impacto di supervision directo di Hulanda riba autonomia y autodeterminacion di Aruba, ademas di mina e autoridadnan local.

A pesar cu tabata e propio Gabinete Wever-Croes II, den cual Oduber tambe tabata minister, cu a negocia e condicionnan di e prestamo di Covid, Oduber ta cuestiona Wever si e ta haya husto cu e prestamo di emergencia pa pandemia a bin cu e condicion di supervision financiero di Reino.

Finalisando, Parlamentario Oduber a haci un apelacion urgente na Minister Wever y Gobierno pa bin duna Parlamento y pueblo di Aruba informacion y transparencia riba e contenido y negociacion di e Rijkswet.“Aruba no mester di representante cu ta cla pa entrega tur loke nos pueblo a lucha pa. Nos mester di lider cu ta sali den defensa di nos libertad, nos lucha y nos futuro.”

E preguntanan:
 1. Minister Wever por comparti cu Parlamento cuanto e surplus pa añanan 2025, 2026 y 2027 lo ta?

2. Minister Wever por informa Parlamento dicon supervision financiero CAft no ta funciona?

3. Dicon minister Wever ta kere mester un Rijkswet di supervision financiero si Aruba tin surplus, Aruba a cumpli cu tur e normanan financiero hancra den e ley di supervision financiero (LAft), Aruba ta cumpliendo cu tur su obligacionnan y Aruba tin perspectiva positivo?

4. CAft a caba di duna compliment na e maneho financiero hiba pa Gabinete Wever-Croes, cu minister Wever tambe a forma parti di dje. Kico ta minister su opinion riba e maneho hiba?

5. Minister Wever ta haya husto cu pa motibo di un pandemia, Aruba mester a presta Afl. 916 miyon florin y un di e condicionnan a cambio ta cu nos mester entrega nos autonomia por medio di un Rijkswet?

6. Minister Wever por informa Parlamento kico ta e hustificacion y argumentacion pa acepta un Rijkswet si Aruba tin surplus, Aruba ta cumpli cu tur su obligacionnan y no ta coriendo ningun riesgo financiero?
7. Minister Wever por splica kico lo pasa cu CAft si bin un Rijkswet?

8. Minister por splica Parlamento kico ta e consecuencianan pa e budgetrecht di Parlamento na momento cu e Rijkswet bira realidad?

9. Un decision asina drastico y cu tin un impacto grandi, cu ta entrega nos autonomia financiero y mina autoridad di Parlamento, minister Wever no ta kere pueblo mester por expresa y duna nan opinion riba esaki?

10. Partido AVP tabata totalmente contra Rijkswet pa scapa nos autonomia mientras, Partido Futuro ta totalmente na fabor pa entrega nos autonomia. Minister por informa unda partidonan ta para awe pa cu e Rijkswet?
11. Kico tur lo mester entrega como Pais Aruba sin acepta un Rijkswet?
12. Ki minister Wever su Opinion ta riba e Rijkswet den sentido di autonomia? Minister Wever ta considera esaki entrega di nos lucha y autonomia?

13. Kico lo ta asina devastador si no acepta e Rijkswet?
14. Minister Wever ta dispuesto pa entrega nos lucha, libertad y autonomia?

15. Si no cumpli cu e normanan stipula den e Rijkswet, kende lo dicidi riba sancionnan, Parlamento di Aruba of Tweede Kamer?
16. Kende lo vota y kende lo por trece cambionan den e Rijkswt (recht van amendement), Parlamento di Aruba of Tweede Kamer?
17. Si e contesta ta Tweede Kamer, minister no ta kere esaki ta kita autoridad di miembronan di Parlamento?

18. Dicon si Aruba tin supervision financiero caba desde 2014 mester un otro supervision financiero?
19. Minister Wever ta kere cu Aruba tin cu mantene su Status Aparte sin torno na dje?

20. Si mi sigui liña di pensamento di minister Wever mi ta sinti cu minister Wever kier pa Aruba bira un municipio di Hulanda. Esaki ta cuadra?
21. Siguiendo riba pregunta 20, minister Wever lo desea di bira burgermeester?
22. Kico ta e rol di Parlamento y Gobierno ora Aruba tin un Rijkswet?
23. Ki dia Parlamento di Aruba lo haya mas informacion di entrega di nos autonomia?
24. Dicon minister Wever no tin confiansa den nos mes hendenan pa maneha nos mes finanzas publico?

25. Pidiendo pa un Rijkswet ta duna nos mes un brevet van overmogen! Minister Wever no tin confiansa den su mes pa maneha finanzas publico y mantene nos mes na e normanan di LAft?

26. Dicon si nos tin supervision financiero hancra den e LAft mester un ley di Reino manera e RAft?
27. Corsou y Sint Maarten a acepta un Rijkswet a cambio di un kwijtschelding di tur nan debenan. Aruba ta hayando un Rijkswet a cambio di un reduccion di interes?
28. Siguiendo riba pregunta 27, minister Wever ta considera esaki como un trato igual?

29. Minister por informa Parlamento kico ta e diferencia fundamental entre e LAft y e Rijkswet financieel toezicht?

30. Mi ta kere cu hendenan manera minister Wever ta peligroso pa pais. Ta hendenan cu ta cla pa entrega tur cos pa un sakito di placa. Minister Wever ta kere cu ta vale la pena entrega tur cos pa algun miyon florin siendo cu nos tin un surplus enorme y por paga back e prestamo sin problema y asina mantene nos lucha, libertad y autonomia?

Concluyendo, Oduber a bisa: “Si minister no ta sinti cu bo persona por para den bo sapato, e ora entrega e puesto di representante di Aruba. Aruba mester di gobernantenan cu ta sali na defensa di Aruba y e bienestar y futuro di su hendenan. Minister Wever a wordo scogi pa sirbi interes di pais Aruba y pa defende Aruba y NO pa entrega tur loke nos a lucha p’e y despues di hopi lucha a logra di haya su libertad y autonomia.”

Por lesa mas riba e topico aki den nos Editorial riba pagina 5 di e edicion aki.