Mariniernan di e Scuadron di Marina di Caribe di Aruba (MSC), hunto cu e destacamento di Mariniernan di Sint Maarten ademas di gruponan di boto di Aruba y Corsou, ultimo tres simannan a trein hunto cu Mariniernan Mericano procedente di “II Marine Expeditionary Force” durante e ehercicio “Caribbean Urban Warrior”. E ehercicio a tuma luga na Camp Lejeune, e base di Cuerpo di Marina di Estados Unidos (USMC), aya na North Carolina. 

 

E ehercicio tabata den e luz di Operacionnan Militar riba Terenonan Urbano (Military Operations in Urban Terrain MOUT). Banda di esey e patruyanan di observacion avansa, tiradonan designa, ingenieronan di infanteria y salvaguardia nan di combate a eherce training intercambia, den colaboracion cu Mariniernan Mericano di e segundo Division di Marina. E Mariniernan a trein riba nivel di seccion den diferente facilidad na e base, tal manera Training Interno di Inmersion di Infanteria, MOUT Mobil (operacion Militar Tereno urbano) y otro areanan di entrenamento. Banda di atakenan segun seccion, tambe nan a eherce operacionnan riba nivel di trupa, entre otro un atake anfibio (asalto) y atakenan riba obhetonan den un aldea di entrenamento.

 

Defensa Region Caribe pa añanan largo ya a bin ta traha hunto cu Mariniernan di Estados Unidos, como un elemento di e colaboracion bi-nacional entre e Cuerponan. Anualmente, tanto den Region Caribe como na Estados Unidos, tin training conhunto. E colaboracion ta reforsa e vinculo mutuo y ta brinda chensnan valioso pa un siña di e otro. Camp Lejeune ta brinda posibilidadnan unico y extenso pa train, pa medio di cual e Mariniernan por trein riba un nivel aun mas halto cu ta posibel den region Caribe.

 

Durante e ehercicio, Comandante di Forsanan Naval den region Caribe, Comandante Walter Hansen, a trece un bishita di trabou na Camp Lejeune. Den cuadro di e bishita aki el a papia entre otro cu Teniente General Calvert L. Worth, Comandante di “II Marine Expeditionary Force”, tocante e colaboracion bilateral y e refuerso mas aleu di e relacion militar entre e paisnan. Mes ora tambe el a bishita e Mariniernan di Defensa Region Caribe Hulandes y nan coleganan Mericano durante e ehercicio final conhunto di “Caribbean Urban Warrior”.

 

Danki na training intensivo tal manera “Caribbean Urban Warrior” e Mariniernan di Defensa Region Caribe ta keda cla pa nan tarea y hunto cu esey tambe e defensa di e parti di Caribe di Reino.