Ayera mainta, prome minister Mike Eman a reuni cu Gobernador di Aruba, SE Alfonso Boekhoudt. Durante e bishita rutinario aki, e mandatario a indica, un di e temanan cu a bin dilanti ta e proceso di screening di candidato pa minister Mike de Meza. Eman a duna un actualisacion riba esaki sigurando cu e proceso lo cana e caminda manera ley ta prescribi.

Minister Eman a splica cu dialuna nan a ricibi for di Departamento di Impuesto (DIMP) documentonan relacion cu e screening di De Meza. Esaki despues cu De Meza a haci diferente bishita y tene reunionnan cu DIMP y a percura tambe pa a base di e ley y articulonan cu tin pa yega na cierto acuerdo. Gobernador di Aruba tambe a ricibi e documentonan aki.

El a remarca cu aworaki loke ta sigui ta cu mester tene un reunion cu De Meza pa dialoga tocante e documentonan aki y kico ta bira e siguiente pasonan.

Pa loke ta resultadonan di e screening di DIMP, e mandatario a enfatisa cu esey ta informacion cu tin cu tene semper priva, pero el agrega cu ta hopi duidelijk cu den e periodo cu a haya e oportunidad pa ta den contact cu belasting dienst, hopi cos a ser clarifica pa loke ta trata e screening di e candidato pa minister.

Minister Eman a subraya cu toch semper nan ta keda cu respet pa e e opinion di e dienstnan, y tambe ta tene cuenta cu e parti huridico, con ta interpreta diferente tema. “P’esey e documentonan cu nos haya awo, cu gobernador tin, combersacion cu De Meza tambe ta hopi importante,” el a indica.

“Laga nos corda cu esaki ta un hende cu semper a entrega su mes na sirbi e pais aki. El a pone su companianan inactivo desde momento cu el a bira minister y despues di esey nan a keda inactivo tur e añanan ey. Un sacrificio hopi grandi cu el a haci pasobra e companianan aki tabata companianan floreciente cu tabata duna servicio na refineria e tempo ey y toch el a scoge e tempo ey pa sirbi su publico,” e mandatario a enfatisa.

El a indica cu a pesar cu e proceso di screening ta uno cu nomber en realidad no ta conoci, cual ta e motibo pakico ta tene henter e proceso asina, na Aruba e ta practicamente imposibel pa tene e informacion asina warda.

“Na momento cu tur hende sa cu un persona ta candidato potencial pa minister, ta specula y esey ta pone cu e situacion ta bira mas dificil pa tene naturalmente e persona for di e discusion publico,” el a señala.

El a splica cu nan ta bay hiba e proceso di e combersacion a base di e documentonan cu nan a ricibi, y na mesun momento a subraya cu ta importante pa toch semper tene na cuenta e entrega cu e personanan aki a haci pa sirbi nos pais.

Contestando e pregunta si tin fecha pa cual De Meza por asumi poder of cu e situacion mester ta soluciona, premier Eman a simplemente bisa cu mas pronto cu ta posibel. Tambe ora miembro di prensa a puntr’e, mirando e situacion cu De Meza, si tin otro persona den mente pa bira minister, el a bisa cu e no ta contesta preguntanan hipotetico.

Premier Eman a indica cu e topico aki tambe a bin dilanti den Conseho di Minister pasobra e ta toca henter e gabinete. “Nos tin un vacatura, mester yega na pone un hende eynan y candidato pa minister De Meza ta e persona. Mi ta kere na Aruba no tin niun hende mas prepara pa e funcion aki,” el a remarca.

El a sigui splica cu De Meza a prepara su mes tambe, tabatin hopi consehero cu durante lunas a sinta mira tur e retonan cu tin riba e tereno di gobernacion, infrastructura y e tema importante di refineria y su futuro.

Pa loke ta e proceso di screening y si tabatin otro departamento cu a subraya algun cos cu no ta klop, e mandatario a splica cu DIMP ta e unico departamento cu ainda mester a haci algo cu nan pa wak con por a trece trankilidad den henter e situacion aki.

“Mi ta kere esey ta importante y mi ta kere conociendo De Meza cu e tambe lo kier asina. Pa no ser acusa cu gobierno of lider di partido of minister president a pone presion riba DIMP,” el a indica.

Premier Eman a enfatisa cu DIMP riba su propio tempo y huicio a tuma tempo pa traha locual nan a traha y nan ningun momento, por lo menos di su parti, a haci ningun intento pa duna ningun influencia na esey.

“Mi ta kere esey ta parti tambe di e nivel di gobernacion cu ta spera di AVP. Si tin algo cu ta preocupa nos comunidad hopi ta cu durante añanan di gobernacion anterior tabatin hopi influencia riba institutonan cu mester ta imparcial y obhetivo cu pa metanan politico a pone presion riba institutonan cu awe ta haci cu entre otro den caso di DIMP hopi hende ta specula politicamente locual ta haci daño na e institutonan,” el a enfatisa.

El a agrega cu durante añas cu tabatin hopi metemento den e departamentonan aki a crea un desconfiansa den comunidad pa cu por ehempel institutonan cu ultimo añanan tabata hopi den discusion.

“Ta importante pa nos duna ehempel pa no mete den e departamentonan ey y pa no duna instruccion na e departamentonan ey pa locual ta trata prioridad,” el a remarca.

Otro persona cu ta en espera di e resultado di su screening ta Rene Herde, candidato pa bira minister plenipotenciario. Tocante esaki, minister Eman a splica cu Herde a pasa tur e screening y tin cu ainda entrega e documentacion di declaracion personal di dje y miembronan di su famia.

El a agrega cu tur instituto cu a haci evaluacion tabata positivo, pero no a confirma si el a pasa screening.