Continuando cu e tema di e plannan di implementacion di maneho financiero cu Gabinete AVP-FUTURO ta describi den su programa di gobernacion, den e articulo aki ta elabora riba e maneho di compania estatal cu e gobierno nobo kier implementa y ciclo di presupuesto, entre otro.

Un di e enfokenan primordial di Gabinete AVP-FUTURO ta mehora poder di compra di tur ciudadano. Pa logra esaki, via e presupuesto, gobierno lo diseña y implementa e Plan Poder di Compra pa, na un forma holistico y prudente, mehora e poder di compra na Aruba pa tur grupo den necesidad.

Pa loke ta e punto di maneho di companianan estatal, gobierno ta indica cu companianan estatal tin como meta sirbi e interes publico pa asina contribui na e bienestar di e pais. Pa mehora e funcionamento di tur compania estatal, Gabinete AVP-FUTURO lo introduci e ley di Good Corporate Governance y lo introduci perfil di funcion, proceso transparente di solicitud y nombramento di director y comisario.

Ademas lo nombra director y comisario basa riba profesionalismo, educacion, experiencia y imparcialidad y den caso di nombramento di director y comisario, e nombramento lo tuma luga despues di consulta den consejo di minister.

Tambe lo implementa aprobacion di cuenta anual na tempo, inspeccion (doorlichting) cada tres aña, lo introduci un deelnemersbeleid, un maneho di dividendo (dividendenbeleid) y lo evalua e efectuacion di e Landsverordening Normering Topinkomens pa posibel adaptacion cu ta evita cu profesionalnan local ta bay for di Aruba of no kier bin traha na Aruba.

Pa amplia e base di impuesto, den un dialogo fiscal, gobierno lo evalua e reemplaso di BBO cu BTW pa, entre otro, elimina e efecto acumulativo di BBO, sin aumenta e peso di belasting pa ciudadanonan y comercio.

Lo evalua tambe e contribucion fiscal di e sector hotelero, y alabes lo evalua y stimula e contribucion fiscal di e sector di vacation rentals.

Pa stimula e contribucion fiscal y crea un “level playing field” Gabinete AVP-FUTURO lo introduci un maneho pa legalisa e personanan indocumenta y lo implementa e plan nacional pa baha e economia informal.

Otro meta di e gabinete nobo ta pa mehora e clima di inversion. Lo haci esaki a traves di simplificacion fiscal integral y husto pa reduci e peso administrativo. Adicionalmente lo duna incentivo fiscal pa desaroyo di agricultura comercial, economia blauw, sector di tecnologia financiero, energia renovable, industria creativo y desaroyo di Oranjestad y San Nicolas.

Gobierno tin planes pa evalua y implementa e documento ‘Proposal Investment and Fiscal Incentives’ traha door di experto den Commissie Economisch Herstel y demas experto local, y pa implementa e lista di actividad nobo cu por haci den Zona Liber (Freezone).

Pa loke ta trata e ciclo di presupuesto, Gabinete AVP-FUTURO ta remarca cu e ciclo di presupuesto mester ta eficiente y efectivo pa gobierno por ta ‘den control’ di finanzas publico y responsabilisa na Parlamento.

Pa logra esaki gobierno lo hancra den ley e definicion di, entre otro, “meeavller”, “tegenvaller” y “onderuitputting” pa garantisa un punto di salida den evaluacion di normannan di presupuesto; lo continua cu ehecucion di implementacion di proyectonan den Landspakket; lo entrega e presupuesto conforme ley; lo evalua, adapta y entrega e “uitvoeringsrapportage” conforme ley; lo haal in e retraso di entrega di e cuentanan anual; y lo implementa e recomendacion di Algemene Rekenkamer Aruba (ARA).

Ademas di esaki gobierno tin como meta fortalece e rol di Departamento di Finanzas den maneho di e administracion central di presupuesto y administracion. Esaki ta encera, entre otro, standarisa e proceso, procedura y formato di e maneho di e ciclo presupuestario y administracion central na Departamento di Finanzas.

Por ultimo lo mehora e contenido di informacion den e presupuesto pa Parlamento di Aruba por eherce su derechonan debidamente y lo introduci un curso pa tur funcionario di finanzas publico den funcion administrativo y ciclo presupuestario.

Capacidad di Departamentonan tambe tin atencion di e gabinete nobo. Den esaki gobierno tin plan pa fortalece Departamento di Finanzas pa, na un manera eficiente, efectivo y transparente, ehecuta su rol di administrador di e administracion central di Pais Aruba.

Ademas gobierno lo fortalece Departamento di Impuesto pa, na un manera eficiente, efectivo y transparente, ehecuta e maneho fiscal basa riba un sistema fiscal moderno y husto, cu suficiente facilidad pa e sector comercial, un miho proteccion legal pa tur contribuyente y menos obligacion administrativo posibel.

Otro di e puntonan ta fortalece Departamento di Aduana pa, na un manera eficiente, efectivo y transparente, ehecuta e maneho fiscal moderno y husto, cu suficiente facilidad pa e sector comercial, un miho proteccion legal pa tur contribuyente y menos obligacion administrativo posibel. Y Ademas, tin plan pa fortalece Aduana cu scanners y tecnologia pa mehora eficiencia.

Adicionalmente Gabinete AVP-FUTURO tin bista pa fortalece Centrale Accountants Dienst pa por debidamente controla e cuenta anual di Pais Aruba.

Hunto cu ministerio di Educacion y ministerio di Aparato Gubernamental, lo introduci un “Financieel Traineeprogramma” pa facilita recien graduadonan cu kier traha den un funcion financiero, haya e experiencia necesario.

Por ultimo, den sector financiero, gobierno tin como meta introduci e Landsverordening Toezicht Betaaldienstverleners y Landsverordening Toezicht Aanbieders van Betalingssystemen; stimula plataformanan di pago digital local pa reduci gasto di transaccion; y Evalua con por stimula e concepto di ‘reversed mortgage’ pa, entre otro, adulto mayor por usa e equidad cu nan tin den nan cas.