Proceso di screening pa candidatonan di minister a cuminsa alrededor di un luna pasa, na momento cu partidonan AVP y Futuro a yega na un acuerdo pa forma gobierno. Despues di un proceso extenso y largo, seis di e siete candidato pa minister a pasa e screening y a huramenta como minister di Gabinete AVP-FUTURO; pero un di e candidatonan aki no a logra pasa su screening, y te ainda ta en espera di e luz berde pa e por asumi cu cargo.

Manera ya caba ta conoci parlamentario di fraccion AVP, y candidato pa minister, Mike de Meza no a pasa su screening pa huramenta como minister di Gabinete AVP-FUTURO. Esaki ta debi na problema cu su screening den departamento di Impuesto.

Di su banda, parlamentario de Meza mes anteriormente a indica na e noticiero local Noticia Cla cu tin obhecion den e screening di DIMP y cu si mester yega na un areglo pa algo, husto of no, por haci un areglo mescos cu tur hende ta haci, sigurando na mesun momento cu no tin nada straño.

Segun informacion e motibo pakico ainda parlamentario de Meza no a haya luz berde for di DIMP tin di haber cu pago di impuesto di un compania cu e tabata registra bou di su nomber pero cu tin 19 aña inactivo, cual segun el a indica DIMP mes no a atende cune.

Mientras tanto Gabinete AVP-FUTURO keto bay ta funciona cu seis minister y e carteranan cu inicialmente tabata di bay pa de Meza a ser reparti entre e ministernan cu si a pasa screening y a huramenta.

E situacion cu parlamentario de Meza a trece dilanti pregunta di parti di oposicion, cu algun parlamentario di otro fraccion cuestionando henter e situacion alrededor di e screening di e candidato pa minister.

Parlamentario di fraccion MEP Rocco Tjon, a traves di un comunicado di prensa, a remarca cu minister di Finanzas, Asuntonan Economico y Sector Primario, Geoffrey Wever mester indica unda e ta para pa loke ta trata screening di Mike de Meza.

Parlamentario Tjon a señala cu MEP a tuma nota cu den medionan di comunicacion tin atakenan frontal contra di DIMP como organisacion, contra e directora y tambe e profesionalnan cu ta forma parti di e organisacion. E atakenan aki, el a indica, ta bin di parlamentario De Meza, su simpatisantenan, pero tambe di parti di candidato y parlamentarionan di partido AVP.

Parlamentario Tjon a menciona cu e publicacion riba rednan social di minister Wever tocante e reunion cu e mandatario a tene recientemente cu directora di DIMP, ta un muestra di sosten pa DIMP.

E parlamentario ta señala cu na final di e reunion minister Wever a indica “claramente cu e ta considera DIMP un organisacion profesional cu empleadonan publico capaZ y determina pa eherce nan trabou cu honor y consenshi, manera debe ser. Minister Wever a lag’e ta duidelijk cu e ta confia plenamente den DIMP su profesionalismo!” el a remarca.

Segun Tjon e publicacion ta hib’e na e conclusion cu minister Wever no ta di acuerdo cu su partner den coalicion y nan acusacionnan contra DIMP. Pero a pesar di esaki, el a agrega, na ningun momento partido Futuro, minister Geoffrey Wever y ni minister Gerlien Croes a sali y defende DIMP.

Pa trece claridad den e situacion aki, parlamentario Tjon a manda preguntanan adicional pa minister Wever pa loke ta trata e asunto di ataca un organisacion y e profesionalnan di e forma cu, segun e, AVP a bin ta haci.

E parlamentario a manda cinco pregunta adicional y e preguntanan aki ta referi na e publicacion di minister Wever riba su rednan social.

“Nos a puntr’e directamente si e ta distancia su mes di e atakenan y ponencianan di Sr. De Meza, parlamentarionan di partido AVP y otro candidato y sostenedornan di AVP. Alabes nos a puntr’e si e mes ta confia den e trabou di DIMP unda cu ta trata di un proceso di screening integro, caminda tur persona ta haci nan trabou manera ley ta indica,” parlamentario Tjon a indica.

E parlamentario a remarca cu e ta spera di por ricibi e contestanan riba e preguntanan cu el a manda mas liher posibel, pa asina por trece claridad riba e henter e situacion aki. “Esaki sigur ta crea discordia, desconfiansa y no ta contribui en lo absoluto na un gobierno stabiel y mucho menos na bon gobernacion!,” el a subraya.

Di su banda parlamentario Endy Croes a indica, mediante un comunicado di prensa, cu su persona a tuma nota di desaroyonan interno di Gabinete AVP-FUTURO unda supuestamente lo tin intencion pa nombra Richard Arends como candidato pa minister na luga di Mike de Meza pa motibo di e situacion di sreening di de Meza na DIMP cu ta pega te ainda.

“No por bisa con esaki lo cay pa e pueblo di San Nicolas como cu Richard Arends no tabata riba lista tampoco a aporta na ningun voto pa AVP por ta bek den gobierno. Cu Mike de Meza debe hopi belasting y no a logra yega na un areglo di pago pa asina kizas bira minister ta conoci pa pueblo. Bo mester ta hopi sinberguensa como ex minister di finanzas kende a duna ordo pa cobra tur comerciante y pueblo belasting entre aña 2010 -2014 pa awor bin resulta cu bo mes no tabata paga belasting,” el a remarca.

Na momento cu e di siete candidato pa minister huramenta, sea ta Mike de Meza mes of otro candidato, e lo bira minister di Infrastructura, Energia y Telecomunicacion. E minister aki lo ta encarga cu vivienda publico; desaroyo teritorial di e pais; politica urbano y di renobacion di bario; infrastructura, cu departamentonan di DOW y DIP; maneho di real estate di gobierno; dato di registro di Kadaster; servicio di supervision di tereno y registro di propiedad; politica di awa y coriente (Utilities Aruba y RdA); politica di materia prima y petroleo (CAP NV); maneho di desperdicio (Serlimar y AWSS); Bureau City Inspector; telecomunicacion (Setar); y Departamento di Telecomunicacion.